Charice: ‘Mahal ko po ang buhay ko’

Kamakailan ay lumabas sa telebisyon ang lola ni Charice na si Teresita Relucio at nagsalita tungkol sa diumano’y tangkang pagpapakamatay ng apo dahil sa problemang pinansyal. Nagpadala naman ng opisyal na pahayag sa ABS-CBN ang international singer sa pamamagitan ng kanyang manager na si Glenn Aldueza. “Nitong mga nakaraang araw, pinilit kong manahimik kaysa sagutin ang tanong ng ilan kung totoo nga bang nagtangka ako ng suicide dahil wala na akong pera. Ngayon, pabubulaanan ko ang mga bintang. Mahal ko po ang buhay ko, lalo pa nga’t malaya ko nang naipapahayag ang totoong ako. At mayroon pa rin po akong naitatagong pera,” pahayag ni Charice.

Ngayon ay hindi pa rin nakakasundo ng singer ang kanyang pamil­ya partikular na ang inang si Raquel at kapatid na si Carl mula nang makipagrelasyon si Charice kay Alyssa Quijano.

Gayunpaman ay umaasa naman daw si Charice na mangyayari ang pinapangarap niyang magkakaayos ang kanilang pamilya. “Patul­oy pa rin po akong nagtatrabaho dahil mahal ko ang pamilya ko. Maaaring hindi maayos ang sitwasyon namin ngayon, pero umaasa po akong magiging okay kami sa nalalapit na panahon,” giit ng singer.

Magkasama ngayon sa iisang bubong sina Charice at Alyssa.

Dahil single na, Phil sa England magpa-pasko

Halos magkasunod na nagkahiwalay ang mga magkasintahang sina Phil Younghusband at Angel Locsin at sina Luis Manzano at Jennylyn Mercado. Mula nang pumutok ang balita tungkol dito ay may mga nag-akala raw na may kinalaman si Luis sa paghihiwalay nina Angel at Phil.

Matatandaang na­ging magkarelasyon din sina Angel at Luis ilang taon na ang nakararaan. Ayon naman kay Phil ay alam nilang dalawa ng aktres kung ano talaga ang tunay na dahilan ng kanilang paghihiwalay kaya hindi na apektado ang Football superstar sa nasabing isyu. “Not really, right now I don’t really want to talk about it and I just want to concentrate on my football at the moment and spend time with my family. I know Angel nearly for three years. So she knows the truth and I know the truth,” makahulugang pahayag ni Phil.

 Ngayon ay magkaibigan pa rin daw ang dating magkasintahan at sinusuportahan pa rin ni Phil ang aktres sa lahat ng ginagawa nito. “Yes, we are friends and I still support her and no matter what she does. I will always be here to support her. I’ll watch The Legal Wife (bagong teleserye ni Angel). I’ll watch her movies. I want to support her,” giit ng binata.  Samantala, sa ibang bansa raw ipagdiriwang ni Phil ang nalalapit na Kapaskuhan. “Pupunta ako ng England for two weeks and then babalik ako pagkatapos ng New Year. I have not been back to England in the last four years. So I will be just seeing some friends in England and then I’ll be coming back,” pagtatapos ni Phil. Reports from JAMES C. CANTOS