Piolo ug Shaina nagkasinabot na?

CEBU, Philippines - Okay matud pa sila si Piolo Pascual ug Shaina Magdayao. Hangyo sa aktor nga dili unhan ang mga mahitabo gumikan kay pait matud pa ang showbiz mao nga kanunay’ng dunay isulti ang mga tawo ug hukman na dayon bisan wala pa mahitabo.

Nadawat na sa pamilya

Tak-om si Lorna Tolentino sa pangutana kabahin sa relasyon matud pa nila ni Maxine Magalona ug sa anak niyang si Renz Fernandez. Imbes nga muluwat og pamahayag, igo na lamang kining mi-greet sa young actress ug miingon nga gimahal sa iyang pamilya ang dalaga.

Maja andam mahigugma og balik

Andam na matud pa si Maja Salvador nga mahigugma pag-usab.Dungan niini, gibasura niya ang tsika nga nagbalik sila ni Matteo Guidicelli. Paigo na matud pa para niya nga managhigala sila.

Jessa nakaangkon na og star

Nagmaya pag-ayo ang singer nga si Jessa Zaragoza gumikan kay natuman na gyud ang iyang pangandoy nga makaangkon og kaugalingong star sa  Eastwood’s Walk of Fame. Giingong dakong garbo alang sa mga artista nga makabaton og star sa nahisgutang kalihukan.

Ogie motikang sa ABS-CBN

Special guest ang Kapuso singer nga si Ogie Alcasid sa Kris TV sa ABS-CBN karong Biyernes. Nalipay si  Ogie nga nakabisita siya sa maong istasyon. Kauban ni Ogie nga mo-guest sa maong programa mao sila si Erik Santos, Nyoy Volante, ug Bryan Termulo. 

Direk Celso namatay

Mipanaw kagahapon sa edad nga 69 ang beterano ug banggiitang direktor nga si Celso Ad. Castillo didto sa iyang balay sa Siniloan, Laguna mga alas dos sa buntag. Giatake sa sakit sa kasingkasing ang direktor, kinsa gidala pa sa Pakil General Hospital apan gideklara na nga dead-on-arrival.

Katapusang nakita si Direk Celso sa telebisyon, isip aktor sa milabay nga tuig pinaagi sa seryeng Reputasyon sa ABS-CBN ug Babaeng Hampaslupa sa TV5. Lakip pud sa katapusang proyekto niya ang movie nga Medical Center. Lakip sa cast niini sila si Gloria Diaz, Ara Mina, Zoren Legaspi, Ryan Eigenmann, Denise Laurel, ug Mat Ranillo III. Samtang pipila sa dili malimtan nga mga obra sa direktor mao ang Asedillo (1971), Nympha (1971), Ang Pinakamagandang Hayop Sa Balat Ng Lupa (1974), Patayin Mo Sa Sindak Si Barbara (1974), Burlesk Queen (1977), Pagputi Ng Uwak Pag-itim ng Tagak (1978), Virgin People (1984), ug Paradise Inn (1985).

Sweet mobiya sa GMA-7.

Gikatahong manamilit na puhon ang TV host nga si John “Sweet” Lapus sa iyang mga suod nga higala sa GMA-7 gumikan kay mobalhin siya og laing network. Usa sa gipilan ni Sweet mao ang ABS-CBN.

Trending topic

Trending topic sa mga social networking site sa miaging adlaw  ang  programang  Zoren-Carmina Always, Forever, A Wedding Like No Other.  Usa kini ka wedding special sa ABS-CBN alang sa bag-ong magtiayon nga sila si Carmina ug  Zoren Legaspi.

Kusog ang karisma

Matud pa ni  Judy Ann Santos nga susama nga  gentleman ug kusog ang  karisma nila ni Sen. Bong Revilla, Jr. ug Vic Sotto kinsa mga kauban niya sa pelikulang  Si Agimat, Si Enteng Kabisote at Si Ako, ang official entry sa Imus Productions, M-ZET TV, GMA Films, APT Entertainment,ug  OctoArts alang sa  2012 Metro Manila Film Festival.

Makapalit na og pagkaon

Wala’y  noche buena ang pamilya sa  batang aktres nga si   Ryzza Mae Dizon sa niaging Pasko  Matud pa nga dako gyud og natabang kang Ryzza mao ang  nagkadaiya niya nga proyekto sa GMA busa makahikay na siya sa maong okasyon. Nalakip usab si Ryzza sa  Agimat, Si Enteng Kabisote at Si Ako. (Sanden J. Anadia)

Christmas album  sa Lady Antebellum gihangop

Nakadawat karon og mga positibo nga feedback ang bag-ong Christmas Album sa grupong  Lady Antebellum nga gilangkoban nila ni Hillary Scott, Dave Haywood ug Charles Kelley

Nag-ulohan kini og  "On This Winter's Night" ug giingong todo ang pag-promote sa maong grupo sa nahisgutan nga album.

Nalakip usab sa maong album ang  hugyaw nila nga version sa  A Holly Jolly Christmas, Christmas (Baby Please Come Home), All I Want for Christmas Is You, I'll Be Home for Christmas, This Christmas, The First Noel, On This Winter's Night,  Let it Snow, Let it Snow, Let it Snow,  Have Yourself a Merry Little Christmas,  Silent Night (Lord of My Life), Blue Christmas ug  Silver Bells.

Nasayran nga ang  Lady  Antebellum maoy nagpasikat sa awit nga  Need You Now, Just A Kiss ug uban pa. Nakauban usab sa maong grupo ang Maroon 5 sa pag-awit sa Out of Goodbyes. (BANAT NEWS)