THE BIG DAY: Miss Universe 2011 Fearless Forecast

CEBU, Philippines - Managlahi ang panagna sa duha sa labing katuohan nga pageant observer—www.missosology.com ug www.globalbeauties.com- kabahin sa mugawas nga mananaog karong adlawa sa 60th Miss Universe Coronation Pageant.

Ang missology nagtagna kang Miss Ukraine, Olesia Stefanko, isip mananaog, samtang ang globalbeauties naglantaw kang Miss Malaysia Deborah Henry nga maoy musunod sa korona ni Miss Mexico Ximena Navarete karong adlawa didto sa Sao Paolo, Brazil.

Pero kung managlahi sila og gitagna nga mananaog, managsama ang ilang napanlantawan sa pambato sa Pilipinas nga si Shamcey Supsup, diin matud pa mugawas nga 3rd Runner-Up ang garbo sa General Santos City.

Lahi sa naandang mga edition sa labing prestihiyoso nga pageant, ang 60th version magpili og 15 ka finalists basi sa preliminary performance sa 89 ka mga kandidata niadtong milabay nga Huwebes didto isip panindot sila sa ilang gown ug swimsuit sa ilang pagrampa.

Imbes 15 ra ang naanda, karong tuiga, 16 ang maglangkob sa semifinal round sanglit, automatic man nga semifinalist ang mudaog sa online voting—a first in Miss Universe history.

 Gikan sa 16, magtigi sila pinaagi sa evening gown ug swimsuit aron pilion ang walo nga maoy mu-abante sa next round. Sa nanglabay nga katuigan 10 ang magtigi niining maong round.

Human sa walo, lain napud nga panagtigi ang matigayon aron pilion ang upat nga mao na lang ang mag-ilog sa korona. Hinungdan nga kun ang naandan Top5, karon, sa labing unang higayon, Top 4 ra ang magtinaktakay sa final round.

Final Four

Kung ang missosology maoy pasultihon, ang ilang Top 4 mao ang Ukraine, Peru, Malaysia ug Philippines.

Sa habig sa globalbeauties, Top 4 para nila mao sila si Miss Malaysia, France, Greece, ug Philippines.

Samtang kung si 2006 Bb. Pilipinas-World Anna Maris Igpit maoy pangutan-on, Top 4 para niya mao sila si Miss Venezuela, Malaysia, China ug Philippines.

Nasayran nga ang pambato sa Malaysia karong tuiga, maoy kandidata nila atol sa Miss World 2007 ug roommate sa representante sa Pilipinas niadtong tuiga nga si Maggie Wilson.

Hinungdan, nga suod siya sa mga Pinay beauty-queens tungod sa panaghigalaay usab nga naumol tali nila ni Maggie niadtong 2007 ug nagpadayon hangtud karon.

Ang Miss Universe pageant makita live pinaagi sa ABS-CBN karong alas 10 sa buntag.