Maria Ressa sa GMA News Channel?

CEBU, Philippines - Miulbo karon ang hungihong nga ang kanhi big boss sa news department sa ABS-CBN nga si Maria Ressa maoy modumala sa hulmaon nga GMA News Channel. Mitumaw karon ang mga report nga sa usa na lang ka semana o dili ba kaha sa katapusang bahin na lang sa Pebrero , motak-op na ang Q Channel 11 ug himoon na kini og GMA news channel sa pagbalik niini sa ere. Suma pa sa kolumnista sa Pilipino Star Ngayon nga si Nitz Miralles nga giingong wad-on na sa dili madugay ang mga kasamtangang programa sa maong istasyon apan pipila niini ang ibilin ,kini sama sa Tweetbiz, Full Time Moms  ug Balikbayan apan usbon na ang mga titulo niini. Ipabilin usab ang American Idol, samtang extended ang programang X-Life.

Barbie isip Nita Negrita

Si Barbie Forteza maoy bida sa umaabot nga afternoon soap sa GMA nga Nita Negrita ug subli usab niya nga mapares si Joshua Dionisio. Tsika pa ni Nitz Miralles sa PSN nga si Bea Binene unta ang first choice sa maong role apan dili na kini madayon   gumikan kay gibutang na ang batang aktres sa Captain Barbell.  

Konsyerto ni Gary dili madayon

Dili madayon ang konsyerto ni Gary Valenciano karong Pebrero 12 ug ang kakuwang sa preparasyon maoy gitumbok sa iyang asawa nga si Angeli Pangilinan. Nagkanayon si Nitz Miralles sa PSN nga duna gihapo’y buhaton nga konsyerto si Gary sulod niining tuiga apan wala pa’y gikatakda nga petsa niini.  

Bunga sa pag-ampo

Tsika pa ni Nitz Miralles sa PSN nga puerting ampo ni Polo Ravales sa Baclaran Church aron lang gyud masulod sa Machete nga gibidahan ni Aljur Abrenica sa GMA-7. “Ang dasal ko kay Lord, gusto ko lang maging busy uli and after a day, binigay niya ang Machete. Mabilis akong pinakinggan ni Diyos, kaya nagbalik ako sa Baclaran para magpasalamat,” suma pa sa aktor.

Coco target ni Venus

Nagpanikad na ang bag-ong Kapamilya star nga si Venus Raj sa proyekto nga iyang madawat sa ABS-CBN. Gipahibalo sa beauty queen nga wala pa siya’y idea kung unsa nga mga programa ang iyang madawat karong tuiga apan iyang giklaro nga dili siya mamili og role basta makaya lang niya. Subling gipahibalo ni Venus nga si Coco Martin maoy gusto niya nga mahimong leading man sa una niya nga proyekto ug si Piolo Pascual usab ang iyang second choice. Samtang gipadayag usab ni Venus nga si Angel Locsin ang usa sa giidolo niya nga aktres, gani kanunay siya nga molantaw og Imortal.

Kim ug Gerald sa Your Song

Nagmaya ang Kimerald fans gumikan kay magpares   puhon sa usa ka episode sa Your Song sa ABS-CBN sila si Kim Chiu ug Gerald Anderson. Una na nga gipadayag ni Gerald sa milabay nga adlaw nga bukas gihapon siya nga makatrabaho pagbalik si Kim ug mahitabo na gyud karon ang iyang gilaraw.

CCP nahutdan og pundo

Giboking ni Wilma Doesn’t ang Cultural Center of the Philippines nga matud pa nga wala na’y pundo ang maong entertainment center hinungdan nga mihulma kini karon og stage play, ang ZsaZsa Zaturnnah (Ze Muzikal). Lakip niini si Wilma ug iya usab nga makauban sila si Eula Valdes, Rocky Salumbides, Gabe Mercado, Pinky Amador, Prince Stefan, Kalila Aguilos ug ubos kini sa direksyon ni Chris Millado. “Totoo naman, e. I just want to be honest!,” tsika pa ni Wilma.

Alexandra motikang sa Pilipinas

Moabot dinhi sa Pilipinas karong Enero 25 ang Miss World 2010 nga si Alexandra Mills aron mosaksi sa contract signing nila ni Miss World Organization Head Julia Morley ug Cory Quirino. Si Cory maoy nakakuha sa franchise sa Miss World pageant nga kanhi gihuptan kaniadto sa Binibining Pilipinas Charities Inc.

 “Noy” wala kasulod sa Oscar

Pakyas   ang pelikula ni Coco Martin nga “Noy” nga makasulod sa Best Foreign Language Film category sa Oscar Awards. Siyam ka pelikula ang pilianan nga posibleng masulod sa maong kategoriya ug kini naglangkob sa “Hors la Loi” (Algeria), “Incendies” (Canada), “In a Better World” (Denmark), “Dogtooth” (Greece), “Confessions” (Japan), “Biutiful” (Mexico), “Life Above All” (South Africa), “Tambien la Lluvia” (Spain), ug “Simple Simon” (Sweden).