Charice di ipaduol ni Oprah

CEBU, Philippines - Gisapot matud pa ang mga sakop sa entertainment press kang Charice sa iyang pagpauli dinhi sa Pilipinas dili pa lang dugay. Tsika sa beteranang entertainment columnist ug host Tita Swarding atol sa OkRyan sa dyRC 648 kHz., 10:30 kagahapon sa buntag, pagbuot ni Oprah Winfrey nga walay interview. Wala maka-atraka ang mga tigbalita tungod kay may lima ka bodyguards nga dagko kaayo og mga lawas nga maoy nagbabag aron walay makapaduol kang Charice.

Maria Venus magpa-sexy!

Gikatahong dunay umaabot nga indie film si Miss Universe 4th runner-up Maria Venus Raj, diin matud pa medyo sexy. Kini suma pa ni Tita Swarding, atol sa showbiz-oriented program OkRyan sa dyRC 648kHz kagahapon sa buntag. Matud pa nga ganahan og daghang trabaho si Venus tungod sa iyang gipatukod nga balay para sa iyang pamilya didto sa Bicol.

Kim gi-intriga nga gikontrahan si Jessy

Gi-intriga nga gikontrahan matud pa ni Kim Chiu ang bida sa teleserye nga “Sabel” sa ABS-CBN nga si Jessy Mendiola. Ang tsika nga nasagap ni Tita Swarding mao nga kanunay matud pa nga i-head to foot ni Kim si Jessy matag sugat nila sa hallway sa network. Ang tsika mao nga kang Kim matud pa unang gitanyag ang ‘Sabel” apan si Jessy ang nakakuha niini. Pero, dili mutuo si Tita Swarding niini tungod kay sa iyang nahibaw-an, buotan si Kim.”Soft-spoken at mabait,” niya pa.

Tomboy nga ABS-CBN executive lover ni Phoemela?

Tomboy ang bag-ong hinigugma ni Phoemela Baranda nga kapuyo na matud pa niini karon. Kini maoy tsika ni Tita Swarding atol sa OkRyan sa dyRC 648 kHz kagahapon sa buntag. Suma pa, adunahan ug dako og ranggo sa ABS-CBN ang maong tomboy, diin gidid-an niini ang TV host nga mag-make-up. Ang maong tomboy matud pa maoy misawo kang Phoem human kini nakigbuwag sa kanhi niya uyab nga businessman/politician nga kanunay lang mamun-og niya.

Baron wala nagpakita sa korte

Wala mopatim-aw si Baron Geisler sa hearing sa kasong Acts of Lasciviousness and Unjust Vexation nga gipasaka ni Yasmien Kurdi batok kaniya. Mihilak si Yasmien tungod malangay na ang pagtaral sa maong kaso.

Kim mibasura sa intriga

Gihimakak ni Kim Chiu ang report nga matud pa nakit-an silang duha ni John Prats nga nag-date. Sa interview ni Vinia Vivar para sa Pang-Masa, nagkanayon si Kim nga dili sila close ni John ug sa trabaho ra sila magkauban ug iyang panghinaut nga dili na modako ang maong isyu. Si John maoy gikatahong uyab karon sa singer nga si Rachelle Ann Go.

Gerald miarangkada na

Sugdan na karong January 22 ang labing unang project ni Gerald Anderson sa tuig 2011 , ang “Rod Santiago’s Buhawi Jack”. Nasayran nga matag adlaw ang training ni Gerald sa martial arts gumikan kay gikinahanglan kini sa iyang karakter sa maong serye. Target ni Gerald karong tuiga nga monindot ang iyang lawas. “My new year’s resolution is to have the best body I can get,” suma pa ni Gerald.

Male version ni Sarah

Malipayon ang young singer nga si Gerald Santos sa mga tawo nga mihulagway kaniya nga matud pa siya maoy male version ni Sarah Geronimo. “Sobrang laking compliment yun para sakin” nagkanayon si Gerald. Busy karong panahona si Gerald Santos sa pag-promote sa iyang album nga matud pa nakaangkon na og gold record. Ilusad na pud ni Gerald ang music video sa carrier single niya nga “Ang ‘Yong Pagmamahal’ nga nalakip sa iyang album nga “Gerald Santos:Pinakahihintay, The Repackaged Edition” ubos sa Prinstar Music Philippines ug giapod- apod sa Polyeast Record.

Sinulog Idol 2011: Mitubod Ang Mga Luha

Napuno sa emosyon ang pagkataktak sa 21 anyos nga registered nurse nga si Emman Zanoria sa Sinulog Idol 2011 atol sa “Jukebox Night” challenge niadtong Martes.

Nasayran nga pagkahuman pa lang daan sa iyang performance, naghilak na kini sa backstage, gumikan nagduda na gyud siya nga siya maoy ma-eliminate niadtong gabhiona.

Aminado si Emman nga dili siya andam niadtong higayona gumikan kay naglain ang iyang lawas hinungdan nga wala niya matagai og igong emosyon ang pag-awit niya sa kanta nga “Mula sa Puso.” Ang mao niyang palpak mao gyuy nabantayan sa mga hurado.

Pero, .33 ang ligas nila sa iyang nakauban sa bottom two niadtong gabhiona nga si Aya Larvios, kinsa taga Minglanilla ug tinun-an sa Asian College of Technology. Si Emman lumad sa dakbayan sa Bogo, ug produkto sa Southwestern University. Niadtong 2009 nalakip siya sa Top 25 sa Starstruck-Central Visayas, diin nagkadungan sila ni Diva Mantalaba.

Samtang para kang Emman, ang sakop sa Catherine of Alexandria of Carcar Choir nga si Primrose Pacenio maoy usa sa labing lig-on nga finalist alang sa titulo nga Sinulog Idol 2011. Kini kay iyang nabantayan nga makamao kini sa bisan unsa nga matang sa kanta.

Samtang nahimo nga Star of the Night ang accountancy student sa University sa San Carlos nga si Simeon Philipp Mancol.

“Wala gyud ko magdahom kay puros gyud nindot ang gipangkanta sa ubang contestants,” suma pa ni Philipp kinsa nahimo usab nga champion sa Carolinian Got Talent sa miaging tuig.

Aminado si Philipp nga dili malikayan nga dunay mga negatibong reaksyon ang mga hurado apan igo ra siya mopahiyom niini ug iya kini nga isipon nga “challenge” aron molambo og samot ang iyang performance. 

Ang laing finalist nga si Rachelle Mae Faelnar mipahibalo nga todo preparasyon ang iyang gibuhat sa pag-apil niya sa maong show, gani duna siya 20 ka mga kanta ang naa sa iyang listahan aron daghan siya og kapilian alang sa mga challenges matag gabii. Si Rachelle nga tinun-an sa Mandaue School for the Arts ug si Ralph Mallapre nga sakop sa UV Chorale sa University of the Visayas, maoy nakauban ni Philipp sa Top 3 sa nahisgutang Jukebox Night challenge.

Kagabii, laing usa pa ka finalist ang gipaabot nga matangtang, aron duna na lay unom ka buok ang magtigi karong gabii alang sa grandfinals.

Ang mga hurado karong tuiga naglakip nila ni Banat Hugyaw editor Ryan Mark, Center for Pop-Cebu branch manager Jay Unchuan, ug Pinoy Dream Academy scholar Apple Abarquez.