Busy, very busy  Tim Yap

Tungod lagi kay aging gay writer na ta, di na jud ko puwede og trabaho or, lakwatsa sa tibook gabii. Pero wa gyud kapugngi kay nadugaydugay ko atong nitambong ko sa appreciation party ni Congresman-elect Benhur Salimangon diha sa Villa Mariquita sa Nivel Hills, unya gikan didto nilahos pa jud mi’s Roger Serna sa bag-ong giablihang McDonald’s outlet sa Cebu Sykes sa Panagdait [part man tingali ni gihapon sa Mabolo, pero hapit na sa Subangdaku], ug nadugaydugay mi didto kay nalingaw mag-istoryahanay mi’s Cerwin Eviota, Daday Melgar [mao ni ang manager sa usa ka FM station sa dakbayan nga gihimo lang intawong komedyante apan makalingaw’ng si Koala sa “Gugmang Dako’g Mata ni Marcos Navarro Sacol] uban ni Tim Yap, ang iladong writer TV personality nga model ug sakop sa taas nga hut-ong sa katilingban sa Metro Manila. Si TimYap man gud ang special guest sa naasoy’ng okasyon, kay si Tim Yap man sab maoy ilang host sa bag-o nilang pakulo nga natapos pod niadtong Hulyo 24.

Sa akong pagpakighinabi ni Tim Yap, nasayran nako nga magsugod ang iyang adlaw sa alas 10 sa buntag,ug labing sayo niyang ikatulog alas kwatro sa kaadlawon [ 4:00 a.m.], busa gitawag siya sa mga taga McDonalds og Norturnal TimYap, kay gikan sa alas dose [12:00 noon] sa udto, magsugod na man siya’g trabaho una, sa iyang kaugalingong condo unit, ug ang ubang mga trabaho adto na sa gawas sa iyang condo unit, makigtagbo sa iyang mga clients, mga tawo nga buot makigsabot niya alang sa hosting, o fashion o commercial modeling  o jingles. Taas si Tim Yap, slim busa angayang mahimong model, ug lareno kaayong manulti sa iningles ug tinagalog. Nagpasalamat siya sa iyang mga ginikanan nga gipatungha siya sa maayong eskuylahan diin mikuha siya sa kursong Management, ug gihatagan usab siya sa iyang mga ginikanan sa iyang kagawasang magpuyo nga mag-inusara aron mabuhat niya ang iyang gustong buhaton, pero mitabang pod siya’g gasto sa iyang mga manghod nga nag-eskuyla pa.