Plane crash: Flight instructor, 3 student pilot sugatan
MANILA, Philippines — Isang flight instructor at tatlong student pilots ang nasugatan makaraang aksidenteng bumagsak ang sinasakyan nilang eroplano sa Iba, Zambales nitong Biyernes ng umaga.
Kinilala ang mga nasugatan na sina Captain Jacques Robert Papio, flight instructor at mga student pilots na sina Jericho Palma, Josj Quinsasay at Althea Kisses Nuñez.
Sa report ni Zambales Police Provincial Police Office Director P/Col. Benjamin Ariola, ang Cessna plane 172 na may tail number RPC 2211 ay galing Ologapo City at ilang minuto matapos itong magtake-off ay bumagsak sa isang lupang sakahan sa lugar.
Ang nasabing aircraft ay nagsasagawa ng training flight nang mangyari ang sakuna sa lugar.
Ayon sa opisyal ang Cessna plane, isang uri ng trainer aircraft ay pag-aari ng isang kumpanya na nakabase sa lalawigang ito.
Mabilis na nagresponde ang rescue team at isinugod sa pagamutan ang mga biktima na nasa mabuti nang kalagayan.
Ipinag-utos na ni Civil Aviation Authority of the Philippines (CAAP) Director General Raul del Rosario ang masusing imbestigasyon upang madetermina kung ano ang sanhi ng pagbagsak ng nasabing trainer aircraft.
- Latest
