Mag-live in na negosyante, inutas sa bus
Anak iimbestigahan…
MANILA, Philippines — Namatay noon din ang magka-live in matapos na malapitang barilin sa ulo ng mga pinaniniwalaang hired killers sa loob ng isang pampasaherong bus kamakalawa ng tanghali sa Carranglan, Nueva Ecija.
Kinilala ang mga nasawing biktima na sina Gloria Mendoza Quillano, 60, tubong Sta. Luciana, Cauayan City, Isabela ay nagtamo ng tatlong tama ng bala sa ulo at leeg habang si Arman Bautista,55,tubong Koronadal City, South Cotabato ay dalawang tama ng bala sa ulo.
Batay sa imbestigasyon, bago naganap ang krimen alas-12:49 ay sumakay ang mga biktima ng Victory Liner Bus na may plakang CAY 3363 patungong Maynila mula sa Tuguegarao City, Cagayan habang sa Bayombong, Nueva Vizcaya naman sumakay ang dalawang hindi pa nakikilang suspek.
Makikita sa dashcam ng bus na nakasakay sa hulihan ang mga suspek na nakasuot ng camouflage na short na asul at pagdating sa Brgy. Minuli, Carranglan, Nueva Ecija ay tumayo ang mga ito at walang sabi-sabing binaril ang mga biktima at saka bumaba ng bus.
Ayon naman kay PMaj.Rey Ian Agliam hepe ng Carranglan,Nueva Ecija Municipal Police Station,na posibleng personal ang motibo sa krimen dahil kapwa negosyante ang mga biktima.
Si Quillano ay may negosyo ng palay at sakahan habang may bakery naman si Bautista.
Lumilitaw din na planado ang pagpatay sa mga biktima at ‘plan B’ na umano ng mga suspek ang krimen sa loob ng bus.
Patuloy pa ang masusing imbestigasyon ng pulisya sa krimen na ikinaalarma ng publiko dahil nalagay sa kuwestyon ang kaligtasan ng mga mananakay sa mga pampublikong sasakyan tulad ng bus.
Kumalat na sa social media ang video kung saan makikita ang marahas na pagpaslang sa dalawang pasahero.
Samantala, iimbestigahan ng Philippine National Police ang anak ni Quillano, isa sa mga binaril at pinatay ng mga hindi pa nakikilalang suspek sa loob ng bus.
Ayon kay PNP PIO chief Col Jean Fajardo, bago nangyari ang insidente ay kinasuhan ni Quillano ng carjacking ang kanyang anak at naka-blotter sa pulisya.
Nakapagpiyansa ang anak sa kaso at itinanggi na may kinalaman siya sa pagpatay sa kanyang nanay.
- Latest