Miyembro ng drug group huli sa higit P1.4 milyong shabu
LUCENA CITY, Philippines — Naaresto ng mga operatiba ng Provincial Drug Enforcement Unit (PDEU) ang isa umanong miyembro ng drug group at nakumpiskahan ng mahigit sa P1-milyong halaga ng hinihinalang shabu sa isinagawang anti-drug operation sa University Site, Barangay Ibabang Dupay kamakalawa ng madaling araw.
Base sa ulat ni PCol.Ledon Monte, Quezon Police Provincial Office (QPPO) Director, nakilala ang nadakip na si Patricio Martin alyas “Nonoy”, 49, may live-in partner, kasapi umano ng “Leonora Drug Group” at residente ng Purok Happy Valley ng nasabing barangay.
Ayon kay P/Major Mendel Casao, hepe ng PDEU, isinagawa ng kanyang mga operatiba ang buy-bust operation laban sa suspek bandang alas-12:23 ng madaling araw makaraang magpositibo ang kanilang surveillance sa suspek kaugnay sa iligal nitong gawain.
Hindi na nakapalag ang suspek makaraang posasan matapos maiabot nito ang isang plastic sachet ng hinihinalang shabu sa poseur buyer na PDEU operative.
Nakumpiska mula sa suspek ang isang P1,000 bill, 12 budol na 1,000, at 13 heat sealed transparent plastic sachet ng suspected shabu na sa kabuuan ay tumitimbang ng 73 gramo at nagkakahalaga ng P1,489,200.00.
Ang suspek ay nahaharap sa kasong paglabag sa R.A. 9165 o Comprehensive Dangerous Drugs Act of 2002.
- Latest
