Parak na ‘tulak’ tiklo sa buy-bust
MANILA, Philippines — Bagsak kalaboso ang isang pulis na miyembro ng Drug Enforcement Unit (DEU) matapos na umano’y mag-moonlighting na drug pusher sa isinagawang buy-bust operation sa Brgy. Basak Pardo, Cebu City nitong Biyernes ng gabi.
Kinilala ang naaresto na si Police Corporal Rogelio Atillo, miyembro ng Labangon Police Precinct (DEU).
Sa ulat, bandang alas-6 ng gabi nang masakote si Atillo sa buy-bust operation sa Sitio Caimito, Brgy. Basak Pardo sa lungsod na ito.
Bagama’t aktibo sa panghuhuli ng mga drug pusher si Atillo pero sa tuwing off duty umano ito ay nagtutulak ng droga kaya isinailalim sa surveillance operation laban dito.
Si Atillo ay inaresto matapos na makumpiskahan ng 25 gramo ng shabu na nagkakahalaga ng P170,000 at P27,000 cash na pinaniniwalaang pinagbentahan nito sa droga. Agad dinisarmahan ng mga kabaro na nagsagawa ng buy-bust operation si Atillo sa dalang Glock 17 service pistol.
Nahaharap ngayon sa kasong kriminal at administratibo ang nasakoteng pasaway na parak.
- Latest
