Mag-asawa nilamon ng apoy
COTABATO CITY, Maguindanao, Philippines - Patay ang mag-asawang public school teacher at Army reservist makaraang ma-trap sa nasunog nilang bahay sa Barangay Namnama, Koronadal City, South Cotabato noong Sabado ng gabi.
Kinilala ang mga biktima na sina Concepcion Mateo, 59; at Romeo Mateo, 57, mga nakatira sa nasabing barangay.
Ayon sa pamangking si Marlon John Aquino, malaki na ang apoy sa bahay kaya walang nagawa ang mga kapitbahay para maisalba ang mag-asawa.
Nakapagpalala pa sa apoy ang tangke ng liquified petroleum gas (LPG) at motorsiklo na sumabog sa loob ng bahay.
Sinabi ni Aquino na bago sila naghiwalay ng tiyahin na si Concepcion, pinaalalahanan pa niya ito sa naka-charge na cellphone.
Gayunman, hindi pa makumpirma ng Bureau of Fire Protection kung ang nag-short circuit na linya ng kuryente sa napabayaang gadget na nakasaksak sa electric outlet ang pinagmulan ng sunog.
Naapula naman ang apoy makalipas ang isang oras kung saan hindi pa batid ang halaga ng mga ari-arian na tinupok ng apoy.
- Latest
