2 bata na-suffocate sa kotse, dedo

MANILA, Philippines – Dalawang bata ang iniulat na namatay matapos itong ma-trap sa loob ng kotse sa isang subdivision sa Barangay Santa Cruz, Antipolo City, Rizal kamakalawa.

Pinaniniwalaang na-suffocate sa loob ng sasakyan ang mga biktimang sina Aljo Hanny Malaco, 4; at Renz Alcoriza, 4, mga nakatira sa Sitio Sta. Cruz sa nasabing barangay.

Bandang alas-3 na ng hapon nang matagpuan ng mga magulang ang mga bata sa loob ng Mitsubishi Lancer (UJC 118) na nakaparada sa loob ng Cavaliers Subdivision sa nabanggit na barangay.

Natunton ang mga bata makaraang may makapagsabi na maaga pa lamang ay namataan ang dalawa sa loob ng sasakyan habang naglalaro at bumubusina pa.

Ayon kay P/Supt. Lucilo Laguna, hepe ang Antipolo City PNP posibleng na-trap ang mga bata sa loob ng kotse habang naglalaro at namatay dahil sa supokasyon.

Gayon pa man, hindi iniaalis ng pulisya ang posibilidad na may foul play sa insidente matapos na lumitaw sa pagsusuri ng mga tauhan ng Scene of the Crime Ope­ratives (SOCO) na may bukol sa ulo si Aljo habang si Renz naman ay may pasa at sugat sa katawan.