Sintunadong kumanta, pinagtataga

TUGUEGARAO CITY, Cagayan, Philippines – Nakikipaglaban kay kamatayan ang 52-anyos na magsasaka na sinasabing sintunadong kumanta matapos itong pagtatagain ng kanyang kainuman na nairita sa pagkanta sa videoke bar sa Barangay Tungel, Baggao, Cagayan kamakalawa.

Kasalukuyang ginagamot sa Baggao District Hospital ang biktimang si Timoteo Antonio Cation habang arestado naman ang suspek na si Jose Espiritu, 32, furniture maker at tubong Naga City, Camarines Norte.

Ayon kay SPO4 Zosimo Sambrano, nagalit ang suspek sa biktima dahil sa sintunadong kumanta ito habang nakikipag-inuman sa videoke bar.

Kaagad na umuwi at pagbalik ay sinamurai ang biktima sa panga at ulo kung saan kaagad namang naawat ng iba pang manginginom ang nagwawalang suspek.