Patayan sa basketball court

QUEZON ,Philippines  — Kamatayan ang naging kapalit ng friendly basketball game sa Purok Masagana Landing matapos pagtulungang saksakin ng mag-utol ang isang 48-anyos na manlalaro sa naganap na panibagong karahasan sa Barangay Ibabang Iyam, Lucena City, Quezon kamaka­lawa ng hapon. Idineklarang patay sa ospital si Diosdado “Dado” Atienza, habang tugis naman ng pulisya ang magkapatid na sina Michael Lachica, 30; at Richard Lachica, 35. Sa ulat nina SPO1 Alvin Evangelista at SPO1 Mario Riego, naglalaro ng basketball ang grupo ng mag-utol at biktima nang magpapalit ang suspek na si Michael sa isang kapitbahay. Umalma naman ang biktima dahil sa senglot ang suspek kaya pansamantalang umalis ito. Nang bumalik ang suspek ay biglang nilapitan nito ang biktimang naglalaro saka inundayan ng saksak kung saan pinagtatadyakan pa ng nakatatandang kapatid ng suspek.