Pulis dinedo ng snatcher

CAMP CRAME – Isang bagitong pulis ang napatay matapos na pagbabarilin ng dalawang notoryus na celfone snatcher sa naganap na karahasan sa Barangay Caboy, Clarin, Bohol kamakalawa.

Dead-on-the-spot ang biktimang si PO1 Raymund Tahanlangit ng 4th Regional Mobile Company ng Regional Mobile Group (RMG) na nakabase sa Catagbacan, Loon, Bohol.

Batay sa ulat ng Police Regional Office (PRO) 7, naganap ang insidente sa harapan ng bahay ng mga magulang ng biktima sa nabanggit na barangay, dakong alas -7 ng gabi.

Habang nakatayo ang biktima ay biglang sumulpot sa lugar ang isang motorsiklong Honda XRM na sinasakyan ng mga suspek at pinaputukan ang nasabing pulis sa mukha at kaliwang dibdib na siya nitong dagliang ikinamatay.

Agad na pinaharurot ang motorsiklo matapos ang pamamaslang sa biktima.

Sinisilip ng mga imbestigador na pagnanakaw ang isa sa motibo ng krimen dahil nawawala ang celfone nito na pinaniniwalaang tinangay ng mga suspek.