2 babae na sinalvage, kilala na

DASMARIÑAS, Cavite – Kinilala na ng pulisya ang dalawang babae na isinilid sa plastic bag na pinaniniwalaang sinalvage at natagpuan sa gate ng Technological University of the Phils. sa Brgy. Salawag sa bayang ito may ilang araw na ang nakalilipas.

Ang mga biktimang may palatandaang pinahirapan muna saka pinatay ay nakilalang sina Melanie Tadlit, 33, may asawa ng Block 4 Lot 18, Phase 1-A Palmeto St., Greenwoods Executive Village, Pasig City at Joan Tindugan, 24, dalaga ng naturan ding lugar.

Pansamantala naman hindi ibinunyag ang pangalan ng mga suspek upang hindi maantala ang isinasagawang dragnet operation ng mga kagawad ng Dasmariñas PNP at Criminal Investigation and Detection Group (CIDG).

Sa impormasyong nakalap ng pulisya, magkaibigan daw ang dalawa at dumalaw lamang si Joan kay Melanie sa bahay at mula noon ay hindi nakita pa ang mga biktima.

May teorya ang pulisya na onsehan sa malaking halagang pera o kaya sa lupang ipinagbili. (Ulat nina Cristina Go-Timbang/Mading Sarmiento)