PNP Chopper bumagsak: 1 pulis patay, 2 sugatan
MANILA, Philippines — Isang pulis ang nasawi habang 2 nasugatan matapos bumagsak ang sinasakyan nilang helicopter ng Philippine National Police (PNP) sa bulubunduking bahagi ng bayan ng Real, Quezon, kahapon ng umaga.
Kinilala ni Police Corporal Grace Calimag ng Quezon PNP Public Information Office ang mga sakay ng chopper na sina PLt.Col Michale Melloria, PLt.Col Dexter P. Vitug at Patrolman Allen Noel U. Ona.
Dinala sa Real Municipal Hospital ang mga sugatang pasaherong sina Melloria at Vitug bago inilipat sa Claro M. Recto Hospital sa Infanta, Quezon, namatay naman si Ona habang ginagamot sa crash site.
Sa inisyal na ulat, ang mga pulis ay sumakay ng PNP Airbus H125 helicopter RP-9710, alas-6:17 ng umaga sa Manila Domestic Airport patungong Northern Quezon para sa administrative mission.
Dakong alas-8:05 ng umaga nang matanggap ang report na bumagsak ang helicopter sa Barangay Pandan, Real, Quezon.
Sinasabing nasa 30 kilometro pa ang layo mula sa Real Town Proper nang bumuhos ang ulan.
Pansamantalang grounded ang buong fleet ng H125 Airbus Police habang isinasagawa imbestigasyon ng CAAP, DOTR at iba pang government agencies. - Tony Sandoval, Arnell Ozaeta
- Latest
