Pamilya, 6 kinatay sa Cagayan
MANILA, Philippines — Anim na miyembro ng isang pamilya ang nasawi habang isa ang nasa malubhang kalagayan matapos silang pasukin at walang-awang ataduhin ng taga ng isang ‘di pa natutukoy na salarin naganap sa tagong lugar sa Sitio San Francisco, Brgy. Ipil, Gonzaga, Cagayan, kahapon ng umaga.
Ayon kay Chief Insp. Elpidio Zingapan, hepe ng PNP Gonzaga, nagmistulang slaughter house sa danak ng sariwang dugo ang tahanan ng pamilya ni Dizon Oandasan, 42, nang dumating ang mga otoridad dakong alas-7:00 ng umaga.
Ang bangkay ni Oandasan at lima pang miyembro ng pamilya nito ay natagpuang nakahandusay na tadtad ng taga sa iba’t-ibang bahagi ng katawan.
Kinilala ang iba pang nasawi na sina Sany, 47, misis ni Dizon; mga anak na sina Wilson, 13; Karen, 12; Dizon Jr., 5; at kaanak na si Juanito Soliva 55.
Habang nasa kritikal naman na kondisyon sa pagamutan ang ika-pitong miyembro ng pamilya na kinilalang si Denison, 3 taong gulang sanhi ng mga tinamong sugat sa iba’t-ibang parte ng katawan.
Ang ‘di pa natutukoy na suspek ay nasa pagamutan din sanhi ng mga tinamong sugat na pinaniniwalaang maaaring nagawang manlaban ni Dizon gamit ang isa ring patalim.
Sinusundan ng pulisya ang anggulong alitan sa lupa ang motibo sa krimen.
- Latest
