Vice Mayor, 4 sugatan sa road mishap

MANILA, Philippines – Nasugatan ang limang katao kabilang ang isang bise alkalde matapos na sumalpok ang sinasakyan nila sa isang nadiskaril na trak sa kahabaan ng national highway, Brgy. Palian, Tupi, South Cotabato kamakalawa.

Ang mga nasugatan ay kinilalang sina Floro Sak Gandam, Vice Mayor ng Lake Sebu, South Cotabato; Maria Gandam; Ernesto Gandam; Emma Tualang; at Mayla Mino.

Batay sa ulat, bago nangyari ang aksidente sa nasabing lugar dakong ala-1:50 ng hapon ay binabagtas ng Ford Ranger (SAA 4810 ) na pag-aari ng pamahalaang bayan ng Lake Sebu at minamaneho ni Gandam nang aksidente itong sumalpok sa isang Fuso truck dropside (GEL 572) na nasiraan sa tabi ng highway.

Sa lakas ng pagkakabangga ay nasugatan ang bise alkalde at mga sakay nito kabilang ang ilan nitong kapamilya.