36 missing... 5 todas sa bangkang lumubog
MANILA, Philippines - Lima katao ang nasawi, 36 ang nawawala habang 14 ang nasugatan matapos ang sinasakyan na pampasaherong bangka ay lumubog sa karagatan ng Sulu noong Huwebes Santo.
Sa ulat ng Joint Task Group (JTG) Sulu, kasalukuyang naglalayag ang MPB/Wilayza sa karagatan sa pagitan ng mga isla ng Tapul at Pata nang balyahin ito ng malalaking alon hanggang sa lumubog.
Bago ito ay alas-10 ng umaga nang umalis ang bangka sa Jun D Lan Port sa Jolo, Sulu patungong Tapul Island at dakong alas-8:00 na ng gabi ng matanggap ni JTG Sulu Commander Col. Alan Arrojado ang ulat sa insidente.
Karamihan sa mga nasawi ay magkakasunod na natagpuan ang bangkay nitong Biyernes Santo matapos lumutang sa dagat.
Nasa 14 survivors naman ang sugatang nasagip ng rescue team ng Philippine Navy at Philippine Coast Guard nitong Huwebes ng gabi.
Ang iba naman sa mga nakaligtas ay sinasabing nasa Tapul Island na bagay na kinukumpirma pa ng mga otoridad.
Lumilitaw sa inisyal na imbestigasyon na overloaded ang bangka na patungo sa Tapul Island na mahigit sa 50 katao bukod pa sa mga tripulante, construction materials na daang sako ng semento at mga bakal. - Joy Cantos-
- Latest
