BVS balik sa pamatay na porma

MANILA, Philippines — Hindi nakalaro si Brooke Van Sickle sa mga nakaraang 2026 PVL On Tour at Invitational Conference dahil sa minor shoulder injury.

Ngunit sa kanyang pagbabalik ay tinulungan ng Fil-American ang Nxled na sumosyo sa liderato ng 2026 Premier Volleyball League (PVL) All-Filipino Conference Siklab leg.

Bagama’t hindi sumalang si Van Sickle sa Invitational Conference ay nakapasok pa rin ang Chameleons sa Finals sa likod nina Myla Pablo at MJ Phillips, ngunit natalo sa guest team ESL Cola ng Thailand.

“It was really tough at moments, but I had the support of my coaching staff and our teammates, too, and management and ownership,” sabi ng 28-anyos na si Van Sickle.

Sa 25-16, 25-20, 25-18 pagwalis ng Nxled sa PLDT ay humataw si Van Sickle ng 11 points kasunod ang kanyang 20 markers sa kanilang 25-19, 25-17, 23-25, 20-25, 15-12 paglusot sa Farm Fresh.

“As we’ve already seen, there’s already been a lot of five-setters. So, as I said, it’s gonna be a dogfight for everybody and be very unpredictable, in my opinion,” wika ng 2024 PVL Reinforced at 2025 Reinforced Best Outside Hitter.

Kasosyo ng Chameleons sa liderato ang Creamline Cool Smashers at Choco Mucho Flying Titans sa pareho nilang 2-0 kartada.

Babalik sa aksyon ang Nxled sa Huwebes sa pagsagupa sa Galeries Tower sa MOA Arena sa Pasay City.