Ando bumuhat ng record sa Cambodia SEA Games

MANILA, Philippines — Winasak ni Tokyo Olympics veteran Elreen Ando ang rekord sa women’s 59 kg. division para hablutin ang ginto sa 32nd Southeast Asian Games sa National Olympic Stadium Hall sa Phnom Penh, Cambodia.

Nagrehistro ang 24-anyos na si Ando ng bagong SEA Games rekord na 216 kgs. sa total habang nagtala rin ito ng bagong marka sa snatch (98 kgs.) at clean and jerk (118 kgs.) para matamis na angkinin ang kampeonato.

Nagkasya lamang sa pilak si Suratwadee Yodsarn ng Thailand na may kabuuang 206 kgs. habang laglag si Hanoi SEA Games champion Hoang Thi Duyen ng Vietnam sa tanso matapos maglista ng 205 kgs.

Si Duyen din ang dating nagmamay-ari ng rekord sa snatch (96 kgs.), clean and jerk (115 kgs.) at total (210 kgs.) na naitala nito noong 2019 edisyon ng SEA Games sa Maynila.

Masaya si Ando dahil pangarap ito ng kanyang namayapang ama.

“Masaya ako dahil matagal ko nang pangarap itong gintong medalya para sa tatay ko,” ani Ando.

Namatay ang kanyang ama na si Rupito sa liver cancer.

“My father wanted me to win this medal while he was still alive. Despite his passing, winning this SEA Games gold remains my goal,” ani Ando.

Matamis na panalo ito para kay Ando na nagkasya lamang sa pilak sa 2019 edisyon ng SEA Games at 2021 Hanoi Games noong lumalaban pa ito sa 64 kgs. class.