Carino mangunguna sa kampanya ng RP cyclists

CHORVOQ, Uzbekistan -- Pamumunuan ni Daniel Ven Carino ang anim pang Pinoy riders sa pagsabak sa 2019 Asian Road Cycling Championships at hangad na sundan ang mga yapak nina Rustom Lim at Rex Luis Krogg na nag-uwi ng medalya sa nasabing annual continental race.

Lalahok ang 21-anyos na si Carino, ang Best Young Rider noong 2018 Le Tour de Filipinas, ng Mangaldan, Pangasinan sa una sa dalawa niyang events na 40-kilometer Men Under-23 individual time trial (ITT) sa Miyerkules (6:30 p.m. Manila time).

Mauuna namang makikita sa aksyon ang 18-anyos na si Marc Ryan Lago ng Taguig City sa 30-km Men Junior ITT para sa koponang ipinadala nina PhilCycling President Abraham Tolentino at Secretary Ge-neral Atty. Billy Sumagui.

Ang kampanya ng tropa ay suportado ng Go For Gold, isa sa limang PhilCycling stakeholders kabilang ang Standard Insurance ni Judes Echauz.

Nasa ilalim ni coach Ednalyn Hualda, ang team ma-nager din ng continental team na  Go For Gold, ang Men’s Junior squad nina Lago, Efren Reyes Jr. (18) at Ean Cajucom (17) ay sasalang sa 105.6-km Men Junior individual road race na magsisimula at magtatapos sa Gazalkent.

Hangad ng nasabing mga Pinoy riders na maduplika o malampasan ang silver medal finish ni Krogg noong 2018 championships sa Myanmar at ang bronze medal finish ni Lim sa Thailand noong 2011.

Muling babanderahan ni Carino ang Under 23 squad sa individual road race na papadyak sa 148.40 kilometro sa Gazalkent.

Makakatuwang ni Carino sina Ismael Gorospe Jr., Joshua Mari Bonifacio at Jerico Lucero sa Under 23 squad na binanggit ni Philippine Sports Commission chairman William Ramirez bilang ‘potential future’ ng Philippine cycling.

Samantala, magsusumite ang PhilCycling ng kanilang bid para pamahalaan ang Asian BMC Championships sa 2020 sa kanilang pagdalo sa Asian Cycling Confederation Congress sa Biyernes sa International Hotel Tashkent. Isang bagong International Cycling Union-regulation BMX track ang malapit nang matapos sa Tagaytay para sa hosting ng 30th Southeast Asian Games.