Kalaban ni Manny malalaman na ihahayag ni Arum bago matapos ang June

MANILA, Philippines - Inaasahang ihahayag ni Bob Arum ng Top Rank Promotions ngayong buwan ang makakalaban ni Manny Pacquiao sa Nobyembre 22 sa The Venetian sa Macau, China.

Kabilang sa mga nasa listahan ay sina Mexican world four-division titlist Juan Manuel Marquez, Russian world light welterweight king Ruslan Provodnikov, light welterweight contender Chris Algieri at Argentinian welterweight Carlos Abregu.

“Manny has a number of options for fighting in November 22nd and we will announce shortly who he is going to be fighting,” wika ni Arum.

“Whether it’s Marquez or somebody else will become clear in the next couple of weeks.”

Matapos matalo kina Timothy Bradley, Jr. at Marquez noong Hunyo 9 at Disyembre 8, 2012, ayon sa pagkakasunod ay bumangon ang Filipino world eight-division champion na si Pacquiao.

Matapos bugbugin si Brandon Rios sa isang non-title fight noong Nobyembre ng 2013 ay niresbakan naman ni Pacquiao si Bradley para bawiin ang kanyang World Boxing Organization (WBO) welterweight crown sa kanilang rematch noong Abril.

Ang naturang titulo ang gustong makuha ng 40-anyos na si Marquez para hirangin siyang unang Mexican fighter na nagkampeon sa limang magkakaibang weight divisions.

Ngunit tutol ang manager at trainer ni Marquez na sina Fernando Beltran at Ignacio Beristain sa pagtatakda ng Marquez-Pacquiao V.

Ito ay dahil nais nina Beltran at Beristain na maiwan sa alaala ng mga boxing fans ang ginawang pagpapatulog ni Marquez sa 35-anyos na si Pacquiao sa kanilang ikaapat na banggaan noong Disyembre ng 2012.

Ayon kay Arum, hindi lamang si Marquez ang maaaring labanan ni Pacquiao sa Nobyembre 22 sa Macau, China.

“There are plenty of names,” sabi ni Arum kina Provodnikov, Algieri at Abregu.