Joshua ug Julia subling magpares

CEBU, Philippines — Subling mag-uban sa usa ka proyekto ang kanhi mag-uyab nga sila si Joshua Garcia ug Julia Barretto  nga kabahin sa show nga “Love Unlock” sa Kapamilya Online Live.

Mosikad na kini karong August 15 sa gabii ug duna kini titulo nga “E-numan”.

Nagtangag kini sa istorya  sa kanhi mag-uyab nga nagkaistoryahanay og balik online samtang nag-inom. Katapusang nag-uban sila si Julia ug Joshua  sa pelikulang Block Z.

Nag-follow na usab sa  usag-usa sila si Joshua   ug Julia sa ilang mga social media account. Kahinumdoman nga naputol ang ilang komunikasyon sukad sila nagbuwag.

Ang  laing episode sa “Love Unlock” pagabidahan nila ni  Arci Muñoz ug Gerald Anderson kun diin nagtangag kini sa titulo nga  “Hook Up”.

Gahot ni Angel

Nanghinaot si Angel Locsin  nga magtingkagol gyud sa  prisohan ang public officials nga mapamatud-an nga guilty sa korupsyon.

Nitumaw ang maong statement sa aktres human niulbo ang giingong anomaliya sa Philippine Health Insurance Corporation (PhilHealth).

"Mahaba-habang pagkakakulong sa siksikan na preso, with no chance of parole [para] sa mga walang pusong corrupt officials,” suma pa sa aktres.

Bea hingpit na nga nahuwasan

Suma pa sa Kapamilya actress nga si Bea Alonzo nga ang pag-move on niya kaniadto maoy usa sa nahimong dalan sa paghulma og balik sa iyang kaugalingon.

Kahinumdoman nga biktima si Bea  kaniadto sa “ghosting” nga usa ka sitwasyon kun diin kalit lang ka biyaan sa usa ka tawo nga wala  gyu’y explanation.

“Being ghosted is the most painful thing a woman can go through…But it could be the most empowering and most beautiful thing that could also happen to a woman.Because you pick up the pieces.And when you pick up the pieces, you discover so much about yourself,” saysay pa ni Bea sa Instagram Live interview niini ni G3 San Diego  sa miaging gabii.

Katapusang nauyab ni Bea mao ang aktor nga si Gerald Anderson.

Alden-Jasmine tandem dili madayon

Gikatahong makabaton  og mini-series ang aktor nga si Alden Richards ug gipangandaman na ang lock in taping niini.

Dunay mga taho nga si Jasmine Curtis Smith diay unta ang makapares ni Alden sa maong proyekto apan dunay mga kakulian hinungdan nga gihulipan ang aktres.

Wala pa motingog si Alden kalabot sa maong proyekto.

“Burado” dili madayon

Pormal na nga gikanselar sa Dreamscape Entertainment ang Kapamilya series nga Burado nga pagabitoonan unta nila ni Nadine Lustre, Julia Montes, Zanjoe Marudo ug Paulo Avelino.

Ang Dreamscape Entertainment maoy nag-produce sa  FPJ's Ang Probinsyano ug  Love Thy Woman.

Nasayran nga sa Thailand unta ang lokasyon sa maong serye. Suma pa nga lisod kaayo himoon ang action scenes karong panahona gumikan sa pandemya.

Dili usab sayon ang paglarga sa usa sa mga bida niini nga Thai actor nga si Denkhun Ngamnet gumikan sa kasamtangang kahimtang sa kalibutan. Nalakip unta sa Burado sila si Angel Aquino, Lotlot de Leon, Ina Raymundo, Joko Diaz, Raymond Bagatsing, Matet de Leon, Kokoy de Santos, ug McCoy de Leon.

Descendants of the Sun makabaton og award

Makadawat og pasidungog sa 15th Seoul International Drama Awards ang remake sa GMA-7 sa K-Drama nga Descendants of the Sun.

Gi-ere kini niadtong February 2020 ug temporaryong giputol tungod sa pandemya.

Usa kini sa tulo sa makadawat og Most Popular Foreign Drama Award.

Ang maong serye gibidahan na ni Jennylyn Mercado ug Dingdong Dantes. Mao kini ang Pinoy adaptation sa Korean drama series  nga unang gibidahan nila ni Song Hye Kyo ug Song Joong Ki.

Kauban sa Descendants of the Sun alang sa maong award mao ang  The New Pope (Sky Atlantic ug HBO) ug Snowpiercer (TNT).

Nasayran nga nakabaton usab og  nominasyon ang Kapamilya series nga Sino ang May Sala? sa 15th Seoul International Drama Awards nga pagahimoon sa M.B.C. Media Center Public Hall  sa Seoul, South Korea, karong September 10, 2020. Aron mapatuman ang health protocol, walay  live audience  sa maong kalihokan.

‘Pagbalhin’ ni Sarah gihimakak

Gihimakak ni GMA Network Films President Annette Gozon-Valdes ang niulbo nga taho nga matud pa mobalhin sa GMA-7 ang Kapamilya singer nga si Sarah Geronimo.

Hinoun nanghinaot siya nga makatrabaho puhon si Sarah.

“Hindi yata haha. But who wouldn’t want to have Sarah right? Hehe. Sana, in the future,” niya pa.

Una na nga nilenggua ang GMA writer nga si Suzette Doctolero  nga welcome kaayo si Sarah sa GMA-7 kun pananglitan ganahan kini mobalhin og laing network.