Majadlok gyud sa “Aldub fans”

CEBU, Philippines - Nadunggan si Maja Salvador nga nikomedya nga dili siya ganahan mutapad kang Alden Richards atol sa award’s night sa 29TH PMPC Star Awards for TV niadtong Huwebes gumikan kay nahadlok siya i-bash sa mga fans sa AlDub.

May mga artista nga babaye man gud nga gipang-away sa mga “fans” matud pa sa AlDub human nakuhaan og hulagway nga katupad si Alden. Usa nila si Kris Bernal.

Sila si Alden ug Maja maoy gitupad sanglit sila maoy nidaog isip Best Drama Actress ug Best Drama Actor. Si Maja nidaog gumikan sa maayo niyang abilidad sa ‘The Legal Wife” samtang si Alden pinaagi sa “Ilustrado.”

Nasayran nga human gipasulod si Alden sa dressing room human nabalda ang programa, gipagawas kini dihang nilinaw na ug wala na nagluhag ang fans. Dinhi sila nagtupad paglingkod ni Maja samtang nagpaabot sa announcement of winners.

May photographer nga nakadungog kang Maja nga nagkanayon ngadto kang Alden: “Usap tayo, Alden, pero diretso lang ulo natin at huwag tayo magtinginan,”

Dinhi matud pa nitubag si Alden og, “ Sorry, Maja.”

Nikomedya sab matud pa si Maja nga hayan magsakit ang iyang liog gumikan sa sige og lingiw. Dinhi nilengua siya kang Alden og, “”Lilingon ako sa kabila. Ayoko humarap sa iyo,”

Wala nagdugay nisaka na sa entablado si Alden aron pagdawat sa iyang trophy ug gisundan ni Maja.

Programa gumikan ni Alden!

Nabalda makadiyot ang gipahigayong programa para sa Star Awards for TV human nagkagubot ang mga fans dihang niabot na sa venue si Alden Richards ug gidala paingon sa iyang lingkuranan tupad nila ni Enrique Gil ug Liza Soberano.

Saysay pa sa writer sa www.pep.ph ug Philippine Movie Press Club (PMPC) member Eric L. Borromeo nga gipahunong gyud makadiyot ang programa gumikan kay nagyagaw na ang mga fans nga ganahan makaduol sa actor aron magpahulagway.

May mga fans pa gyud matud pa nga nagpunay og tawag sa ngalan ni Alden ug bisan og mga bouncers ug security guard na nga nagpalibot sa actor, wala gyud gihapon matarog ang fans, nagtinguha gihapon sila nga makapaduol kang Alden.

Bisan ang LizQuen naglibog na unsa nila pag-react ug diriyot pa maipit sa pagtudtod sa mga fans.

Dinhi na nihukom ang organizers nga pasudlon si Alden sa usa ka bakante nga dressing room sa backstage aron makapadayon ang programa.

Dugang asoy pa ni Borromeo nga bisan sa gawas sa dressing room may mga nagpaabot na nga fans kang Alden ug mihangyo nga magpa- hulagway apan higpit na kaayo ang mga security guards.

Nasayran nga gikan sa Eat Bulaga nidiretso si Alden sa usa ka event para sa produkto nga iyang gi-endorse una pa niadto sa award’s night.  Nakit-an siya nga nakatagpilaw sa dressing room gumikan sa kakapoy.

Ang LizQuen ug AlDub maoy nakadawat sa German Moreno  Power Tandem award sa 29th PMPC Star Awards for TV.

Angel na-operahan na

Nipailawom na sa unang stage sa operasyon si Angel Locsin alang sa iyang disc bulge sa spine didto sa Singapore kagahapon.

Kini base usab sa gi-upload ni Angel nga mga hulagway sa iyang Instagram account kagahapon. Wala niya mahisguti hain siya dapit nagpa opera, apan usa sa mga Pinoy nurse nga ni-assist sa procedure nga gipahigayon ngadto sa aktres ang ni post nga naa sila sa usa ka tambalanan sa Singapore.

Nakadayeg og maayo kang Angel ang mga nurse nga ni-assist kaniya gumikan kay “mabait” ug “witty” matud pa kini.

Kahinumduman nga nauyonan ni Angel ug sa Star Cinema nga dili na ihinayon sa aktres ang subling paglupad isip ‘Darna” gumikan sa iyang balatian. Kini bisan pa man og nag-training na siya alang sa pelikula ug mga duha ka tuig siya nga nangandam alang niini.

Sa nilabay nga semana gipahibawo ni Luis Manzano nga gitakda na nga mupailawom og operasyon ang iyang hinigugma nga si Angel alang sa gihambin niini nga balatian.

Nabalita sab nga duha ka mga operasyon ang sagubangon ni Angel. Ang nahitabo kagahapon, maoy first stage.