Kiefer, Lakestars yuko sa Brave Thunders
MANILA, Philippines — Imbes na regalo ay kabiguan ang natanggap ni Kiefer Ravena sa kanyang ika-28 kaarawan kahapon.
Iginupo ng Kawasaki Brave Thunders si Ravena at ang Shiga Lakestars, 91-74, sa 2021-22 Japan B.League season kahapon sa Ukaruchan Arena.
Nagtala si Ravena ng 13 points mula sa masamang 6-of-13 fieldgoal shooting para sa ikatlong kabiguan ng Lakestars sa siyam na laro.
Pinamunuan naman ni naturalized center at dating PBA import Nick Fazekas ang Brave Thunders (6-2) sa kanyang 14 points, 8 rebounds at 5 assists.
Samantala, tinalo naman ni Bobby Ray Parks Jr. si Thirdy Ravena sa kanilang paghaharap sa 98-70 pagdurog ng Nagoya Diamond Dolphins sa San-En NeoPhoenix sa Toyohashi City General Gymnasium.
Nagtala si Parks ng 12 points para sa Dolphins (5-4) habang may 14 markers si Thirdy sa panig ng NeoPhoenix (3-6).
- Latest
