Bubble training ng national athletes wala pang go signal ng BCDA

MANILA, Philippines — Inaasahan ng Philippine Athletics Track and Field Association (PATAFA) na papayagan sila ng Bases Conversion Development Authority (BCDA) na magkaroon ng ‘bubble’ training sa New Clark City sa Capas, Tarlac.

Ito ay matapos maurong sa susunod na linggo ang pagpasok sana nila bukas sa nasabing venue na ginamit sa 30th Southeast Asian Games noong Disyembre ng 2019.

Hindi pa naaaprubahan ni BCDA president Vince Dizon, ang Deputy Chief Implementer ng National Action Plan Against COVID-19, ang kahilingan ni PATAFA president Philip Ella Juico para sa isang ‘bubble’ training ng kanilang mga atleta.

Plano ni Juico na magdaos ng National Open sa loob ng New Clark City kung saan pipiliin ang mga national athletes na isasabak sa 31st SEA Games sa Hanoi, Vietnam sa Nobyembre.

Ang nasabing annual athletics tournament ay itinakda ng PATAFA sa Marso 19 hanggang 21 kung saan mag-aagawan sa tiket sa national team ang mga kagaya nina 2019 SEAG gold medalists Christine Hallasgo (marathon), Sarah Dequinan (heptathlon) at Melvin Calano (javelin).

Dahil nasa ibang bansa sina Fil-Americans Eric Cray, Kristina Knott, William Morrison, Natalie Uy, Aries Toledo at Clinton Bautista ay hindi na sila isinama sa listahan ng PATAFA sa ‘bubble’ training.