Equestrian out sa Vietnam SEA Games
MANILA, Philippines — Sa simula pa lamang ay alam na ni Equestrian Association of the Philippines (EAP) president Mikee Cojuangco-Jaworski na hindi isasama ang kanilang sports event sa 2021 Southeast Asian Games na idaraos sa Hanoi, Vietnam.
Kaya hindi na siya nagulat na wala sa inisyal na 36 sports ang equestrian.
“We cannot expect na kung hindi nagko-compete iyong isang bansa or hindi nagiging advantage para sa kanila nai-host ‘yung sport or event, hindi talaga nila iho-host iyon,” wika ni Cojuangco-Jaworski.
Ito ang ikalawang sunod na pagkakataon na hindi isinama ang equestrian sa SEA Games matapos noong 2019 na mismong pinamahalaan ng Pilipinas.
Nang huling ibilang ang equestrian sa SEA Games noong 2017 sa Kuala Lumpur, Malaysia ay kinolekta ni Colin Syquia ang nag-iisang gold medal ng bansa sa individual show-jumping event.
Nanghihinayang si Cojuangco-Jaworski, nag-uwi ng gold medal sa individual show jumping event noong 2002 Asian Games sa Busan, Korea, na hindi na naman naisama ang equestrian sa 2021 SEA Games.
“I was not expecting equestrian to be part of it, which, sayang kasi marami sanang plano ‘yung Southeast Asian Equestrian Federation to develop the sport,” ani Cojuangco-Jaworski, miyembro ng International Olympic Committee (IOC) Executive Board.
- Latest
