Navy vs IEM sa Spikers’ Turf Pocari Sweat, Laoag spikers mabibinyagan na

Laro Ngayon

(The Arena, San Juan)

1 p.m.  Navy vs IEM (Men’s)

4 p.m.  NU vs Laoag (Women’s)

6:30 p.m.  Pocari vs UP (Women’s)

MANILA, Philippines - Sisimulan ng paboritong Pocari Sweat ang kampanya nito laban sa University of the Philippines sa paglarga ng 13th Shakey’s V-League Open Conference ngayong hapon sa The Arena sa San Juan City.

Magtutuos ang Pocari at UP sa alas-6:30 ng gabi habang masisilayan naman ang bakbakan ng National University at Laoag sa alas-4 ng hapon.

Maglalaro rin ang Navy at IEM sa nag-iisang men’s game sa ala-una.

Pangungunahan ang Pocari nina dating UAAP Finals MVP Michele Gumabao ng De La Salle University at dating UAAP Best Spiker Myla Pablo kasama sina Elaine Kasilag, Kai Nepomuceno, Rosemarie Vargas, Gyzelle Sy at Melissa Gohing.

Ngunit magbibigay ng magandang laban ang Lady Maroons na umabot sa Final Four sa nakalipas na UAAP Season 78 kung saan babanderahan ito nina middle blocker Kathe­rine Bersola at open hitter Nicole Tiamzon kasama ang super rookies na sina Isa Molde at Diana Carlos.

Nagkaroon naman ng malaking pagbabago sa lineup ng NU matapos mawala sina setters Ivy Perez, Jocelyn Soliven at Rica Diolan, gayundin si Pablo na natapos na ang playing eligibility sa UAAP.

Kaya’t maiiwan ang pa­sanin kina Jaja Santiago, Jorelle Singh at Aiko Urdas. Nadagdag naman sa koponan si Filipino-Japanese Risa Sato habang inaasa­hang darating sa bansa ang bagong setter ng Lady Bulldogs na si Larni Abarin na magmumula sa Amerika.

Pansamantalang magiging setter ng NU sina Audrey Paran at Jasmine Nabor.

“We have to make do with what we have while we wait for our setter from the US,” ani NU coach Roger Gorayeb.

Tatapatan ito nina Chi Saet, Wenneth Eulalio, Mylene Paat at Jessica Galanza.