Para sa mga OFW: Wika ng dadayuhing bansa mahalagang matutuhan

Isa sa reyalidad na kailangang malaman, maunawaan at matanggap ng sino mang gustong manirahan sa ibang bansa, bilang overseas Filipino worker man o permanenteng migrante, na dapat nilang matutuhan ang lengguwahe ng mga tao sa lugar na kanilang dadayuhin. Maaaring isang universal language ang Ingles na itinuturing din na pangalawang pa-ngunahing lengguwahe sa Pilipinas at kabisado ng nakakaraming Pilipino, na dahilan kaya in demand ang mga OFW sa ibang bansa pero hindi lahat ng bansa sa mundo ay nagsasalita o nakakaunawa ng Ingles.

Halimbawa na lang ang Japan, China at Korea at maging sa Russia at ilang bansa sa Europe na panguna-hing ginagamit sa kani-kanilang lugar ang katutubo nilang mga wika. Isa sa mahalagang reki-sitos sa mga dayuhang gustong magtrabaho sa mga lugar na ito ay ang maalam sa sariling wika ng mga bansang ito. Ganito rin sa mga bansang Arabo sa Gitnang Silangan na pangunahin nilang mga sariling wika ang kanilang ginagamit.

Pero kahit naman ang dadayuhin mo ay mga bansang pangunahing nagsasalita ng Ingles, magkakaiba naman ang tono, pagbigkas, sistema at istilo ng paggamit nito tulad sa Amerika at Inglatera.  Iba rin ang Ingles ng Ca-nada bagaman salitang Pranses ang pangalawang lengguwahe nito.

Sa mga problemang kinakaharap ng maraming OFW, isa sa pinakamalaki rito ang tinatawag na language barrier. Nagiging balakid ito sa pakikipag-usap nila sa kanilang mga employer o ibang mga tao sa ibang  bansa dahil hindi nila kabisado o wala man silang alam sa mga salitang ginagamit dito. Hindi sana mangyayari ito kung sa una pa man ay pinag-aaralan na nila ang pa-ngunahing lengguwahe ng mga mamamayan ng bansang kanilang darayuhin.

Maging ang Philippine Overseas Employment Administration ay nagpapaalala sa mga aplikante sa mga trabaho sa ibang bansa na kailangang may matutuhan silang dayuhang lengguwahe. Isa itong kakayahan na hinahanap ng ilang dayuhang employer.

Ayon nga sa Fluent U foreign language immersion online, kung nakasaad sa iyong curriculum vitae na meron kang alam na ibang lengguwahe, mas malaki ang tsansang matanggap ka sa trabaho sa kasalukuyang panahon, kaysa sa ibang mga aplikante na isang lengguwahe lang ang alam.

Ang mga tao na marunong ng iba’t ibang wika ay magagawang makipag-usap at makisalamuha sa iba’t ibang dayuhan.  Maha-laga ito sa mga potential na employer dahil ang ganitong empleyado na may alam na maraming lengguwahe ay maaa-ring makipag-ugnayan sa iba’t ibang klase ng tao. Sa panahon kasi ngayon, pumapasok sa mga bagong market ang mga kumpanya.  Magiging mahalaga ka sa isang kumpanya kung magagawa mong maki-pagtransaksyon sa mga manufacturer halimbawa sa ibang bansa o makipag-usap sa mga customer na hindi nakakaunawa ng sarili mong katutubong wika.

Bukod dito, kung may abilidad kang magsalita ng maraming lengguwahe, ipinapahiwatig lang na meron kang kusang palo at pursigido na may matutuhang bagong skills at meron ka ritong bentahe kumpara sa iba na isang lengguwahe lang ang alam.

Bukod sa bentahe sa trabaho, mas malaki ang bentahe na makapagbiyahe o makapagbabakasyon ka sa iba’t ibang bansa kung meron kang alam na dalawa o mahigit pang dayuhang lengguwahe. Hindi naman kailangang maging napakahusay mo sa mga lengguwaheng ito. Mas natutuwa ang mga lokal na mamamayan ng mga lugar na dinarayo mo na marunong ka ng sarili nilang wika. Ipinapakita lang dito ang respeto mo sa kanila at madaling daan para magkaroon ka ng mga bagong kakilala.

Sinasabi pa sa Fluent U na, habang may natututuhan kang pa-ngalawang lengguwahe, nagiging madali sa iyo ang matutuhan ang iba pang lengguwahe.

Kung meron kang alam na ibang lengguwahe, tumatalas ang iyong memorya at lumalakas ang iyong attention span. Ehersisyo rin sa utak ang pagiging bilingual (iyong mga nakakapagsalita ng dalawang magkaibang lengguwahe). Hinahamon ka rin dito na mag-concentrate at mapalakas ang iyong problem-solving skills.

Ipinahihiwatig din sa ilang pag-aaral na ang bilingualism ay maaaring makaibsan sa epekto ng Alzheimer’s at dementia ng ilang taon.

Ayon din umano sa mga researcher, mas nagiging mapanlikha ang mga tao na maru-nong ng iba’t ibang wika.  Kung meron kang alam na ibang lengguwahe, nakakapag-eksperimento ka sa mga bagong salita at parirala bukod sa pagtalas ng iyong abilidad sa paglutas ng mga problema at makapag-isip ng may lohika.

Nagkakaroon din ng kumpiyansa sa sarili ang mga marunong ng iba’t ibang lengguwahe. Totoo naman na mas interesting ang mga tao na merong self-confident kaysa sa mga taong walang kumpiyansa sa sarili. Nagiging bukas ang isip nila dahil sa mga teknik na ginagamit sa pag-aaral ng ibang lengguwahe.

Para rin makabisa ang natutuhan mong bagong lengguwahe, mahalagang may nakakausap kang mga tao na gumagamit ng mga salitang ito.

Kung mahiyain ka at gusto mong makakilala ng bagong mga tao, magandang pambungad na ang rason na gusto mong matutuhan ang kanilang pananalita para magkaroon ng bagong mga kaibigan, mapalawak ang iyong horizon at ang karanasan mo sa buhay.

* * *

Email- [email protected]