Abalos pabor sa pagbubukas pa sa kapasidad ng negosyo ngayong Hunyo

MANILA, Philippines — Pabor si Metropolitan Manila Development Authority (MMDA) chairman Benhur Abalos Jr. na magbukas pa ng mga karagdagang negosyo at mas mataas na kapasidad ang ipatupad sa mga establisimento sa National Capital region (NCR) sa susunod na buwan.

Sinabi nitong Miyerkules ni Abalos na suportado niya na mas dumami pa ang magbukas na mga  negosyo dahil bumababa na rin naman ang mga kaso ng coronavirus disease 2019 (COVID-19).

“I don’t want to preempt the decision of the mayors… For me, personally, we could open up more businesses and study the capacity itself,” dagdag pa ni Abalos.

Ani pa ni Abalos, pag-uusapan nila sa pulong sa Metro Manila Council (MMC)  ang posibleng pagluluwag o adjustments sa curfew hours sa Metro Manila upang mabigyan ng mas mahabang operating hours ang mga negosyo.

Sa kasalukuyan, umiiral ang mula alas-10:00 ng gabi hanggang alas-4:00 ng madaling araw habang nasa general community quarantine (GCQ) “with heightened restrictions”  ang NCR Plus.