Binata patay sa tarak ni kuya
MANILA, Philippines - Patay ang isang 21- anyos na caretaker makaraang pagsasaksakin ng kanyang sariling kuya dahil lamang sa simpleng pagtatalo sa loob ng bahay ng una sa Quezon City, kahapon ng madaling araw.
Dead-on-arrival sa ospital ang biktimang si Angelo Coquilla, binata ng Ermin Garcia St., Brgy. E. Rodriquez, Cubao, Quezon City.
Tinutugis naman ang kapatid nitong suspek na si Eleuterio Coquilla, 27, ng Brgy. Payatas, QC.
Sa imbestigasyon ni PO1 Christian Loyola, may hawak ng kaso, nangyari ang insidente sa may second floor ng bahay ni Angelo, dakong alas-3:30 ng madaling araw.
Lumalabas na bago ang insidente, masaya pang nag-iinuman ang magkapatid kasama ang mga testigong sina Geraldine Plana, 22, at Joyce Tupaz, 20.
Nag-ugat ang diskusyon ng mag-utol nang humingi si Plana ng isang face towel sa boyfriend na si Eleuterio para pamunas ng pawis, pero ang ibinigay nito ay ang t-shirt ng kapatid na si Angelo dahilan upang magalit ang huli na humantong na sa mainitang pagtatalo.
Para hindi na humaba ang pagtatalo ay nagpasyang bumaba ang biktima. Pero ilang sandali ay nagpasyang bu-malik sa 2nd floor ng bahay para kunin ang naiwang pera. Inakala naman ng kuya nito na siya ang binalikan ng kapatid kaya pinagsusuntok niya ito hanggang sa saksa-kin sa dibdib.
Gayunman, sa kabila ng tinamong sugat ay nagawa pang makababa ng biktima at humingi ng tulong para madala siya sa pagamutan pero hindi na rin umabot pa nang buhay.
Nabatid na mabilis namang tumakas ang suspect na kuya matapos ang insidente.
- Latest
