Paglilitis kay Jinggoy tuloy na

MANILA, Philippines - Tuloy na ang gagawing paglilitis ng Sandiganbayan sa 11 bilang ng kasong katiwalian ni dating senador Jinggoy Estrada kaugnay ng pork barrel scam.

Ito’y matapos ibasura ng Sandiganbayan 5th division ang motion for reconsideration (MR) ni Estrada na nagpapabaliktad sa naunang pagbasura ng korte sa kanyang motion to dismiss.

Sa MR ni Estrada, iginiit ng kampo niya ang argumento na hindi na siya kailangang litisin sa kasong graft dahil absorbed na ito ng kanyang kasong plunders.

Paliwanag ng dating senador, na ang graft ay sangkap lamang o tinatawag na constitutive act sa pandarambong o plunder.

Subalit hindi ito sinang-ayunan ng mga mahistrado ng fifth division ng Sandiganbayan.

Sa resolusyon ng korte, sinasabing ang plunder ay para sa illegal na pagkamkam ng yaman habang ang kaso niyang katiwalian ay dahil sa pagbibigay ng unwarranted benefits o undue advantage sa ibang indibidwal.