P11.5 milyon drugas nasakmit sa operasyon sa PRO-7

CEBU, Philippines — Mokabat sa P11. 5M ang nasakmit nga balor sa illegal nga drugas sa duha ka adlaw nga operations sa Police Regional Office(PRO)-7 niadtong Abril 19 ngadto sa 21.

Nakadakop sab sila og 226 ka indibidwal nga nalambigit sa sugal sama sa illegal numbers game, hantak ug uban pang matang sa sugal ug kapin sa P18,000 nga kwarta ilang nasakmit.

Samtang sikop usab ang dunay mga warrants of arrest human gi-implementar sa kapolisan ang ilang mga warrants nga miresulta sa pagdakop sa 9 ka most wanted persons ug 121 ka other wanted persons.

Sa loose firearms nakahimo usab sila og 112 ka operasyon ug 164 ka armas ang nakompiskar ug ang uban gi surrender, 3 ka explosive ang apil sa nasakmit ug napulo ka tawo angol ang nadakpan.

Suma ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga magpadayon ang PRO-7 sa pagpahigayon og operasyon batok sa bisan unsang matang sa krimen apan iyang gipaniguro nga himoon kini subay sa police operational procedure.

“mao na kung naa gani moy mamatikdan, mahibaw-an nga naay mga police nga wala mag follow sa police operational procedure, illegal ang ilang pag aresto please feel free to report to us we make sure we will not condone any misdead in the organization," segun pa ni Pelare.

Samtang dul-an sa P7M nga balor sa ginadili nga drugas ang nasakmit sa usa 35anyos nga lalaki sa buy-bust operation sa Barangay Subangdaku Mandaue City, Lunes sa gabii.

Ang nasikop naila nga alyas Pao-pao, High Value Individual, residente sa Purok Tugas, Barangay San Isidro, San Fernando Cebu.

Ang operation gihimo sa CIU/CDEU sa Mandaue City Police Office; RID/RDEU; SOU 7, PNP DEG; PDEA7 ug personnel sa PS2 sa MCPO. Nasakmit gikan sa maong dinakpan ang 1,020 kilos sa shabu nga nibalor og 6,936,000.00 ingon man buy-bust money.

Si Paopao giingong nalambigit sa illegal drug trade og kanhi na priso sa Cebu Provincial Detention and Rehabilitation Center ug nakagawas niadtong October 2017.

Giingong makadispatsar kini og 200gramos matag semana apan pagkasikop niini nasayran nga maka dispatsar kini og dili mominos sa usa ka kilo. Si Police Colonel Julius B. Sagandoy, City Director sa Mandaue City Police Station midayeg sa kalampusan sa iyang mga sakop.

Sa laing bahin, 27 ka mga Police Sa Barangay PSB sa Dakbayan sa Mandaue ang gipaubos sa kinalit nga drug test, Martes sa buntag.

Suma pa ni Police Lt. Col. Mercy Villaro ang tigpamaba sa Mandaue City Police Office nga ang pagpaubos nila sa drug test maoy kabahin sa internal cleansing sa PNP.

Dugang pa ni Villaro, ang PSB maoy motabang sa mga kalihukan sa barangay kabahin sa pagmintenar sa kahapsay ug kalinaw sama sa paggiya sa mga tanod sa paghimo sa roving ug uban pa. MEL BANAT NEWS