CT-TODA maningkamot paghawan sa karsada human sa disgrasya

CEBU, Philippines — Gipaningkamotan sa City of Talisay-Traffic Operation Development Authority (CT-TODA) nga mahawan dayon ang karsada sa panahon nga dunay mahitabong disgrasya.

Suma pa ni Jonathan Tumulak, pangu sa CT-TODA nga makatala sila og 10 ngadto sa 20 ka digrasya sa dalan nga makamugna gyud og kahuot sa dagan sa trapiko.

Nagkanayon si Tumulak nga dili sa tanang disgrasya maghimo sila og sketch tungod kay mao kini ang makapalangay.

Ang ilang buhaton mao ang pagpaniid sa sitwasyon ilabi na kun ginagmay lang nga danyos ug magdepende sab sa matag habig sa mga naaksidente.

Ang importante nga makuhaan og upat ka anggulo sa hulagway ang mga sakyanan nga nalambigit sa disgrasya.

Matud ni Tumulak nga adunay higayon nga kadlawon mahitabo ang disgrasya apan iyang gimanduan ang iyang mga sakop nga dili kini paabtan og buntag mahawan na ang karsada aron dili makabalda sa dagan sa trapiko. — /MEL (BANAT NEWS)