Navy warship idineploy sa Escoda Shoal sa WPS

MANILA, Philippines — Nagdeploy na ang Philippine Navy ng warship upang harangin ang posibleng pagtatayo ng artipisyal na isla sa Escoda Shoal (Sabina) sa pinagtatalunang teritoryo sa West Philippine Sea (WPS).

“Navy has increased its patrols in Sabina Shoal and for the past good number of days, we have had one warship stationed in the area,” pahayag ni Commodore Roy Vincent Trinidad, Spokesman ng PH Navy sa WPS.

Sa panayam ng Defense reporters, tinukoy ni Trinidad na ang reclamations sa mga reefs sa WPS partikular na sa mga inukopa ng China na kinabibilangan ng Mischief, Subi at Cuarteron reefs mahigit 10 taon na ang nakalilipas .

“We are on top of the situation. The Coast Guard is there, the Navy is there. We would like to prevent a repeat of what happened in 2012-2013,” saad ni Trinidad kung saan ang reclamation ng China sa lugar ang naturang mga reefs ay naging naval bases na.

Ang Philippine Coast Guard (PCG) ay nagpadala na ng barko, BRP Teresa Magbanua sa nasabing shoal noong Abril 16 matapos na makatanggap ng report sa pagdadagsaan ng Chinese maritime vessels sa Sabina Shoal na mas kilala bilang Escoda Shoal.

Dito’y natagpuan ang mga patay at dinurog na corals na palatandaan ng small-scale reclamation sa nasabing teritoryo.