Paslit pinatay sa sakal ng nanay
Bangkay isinako, itinapon...
MANILA, Philippines — Isang 7-anyos na batang lalaki ang pinatay ng ina sa pamamagitan nang pagsakal gamit ang sinturon at pagkatapos ay isinako ang bangkay bago itinapon naganap kamakalawa sa Brgy. Mabigo, Canlaon City, Negros Oriental.
Pinakiusapan ng pamilya ang pulisya na huwag nang pangalanan ang biktima at nanay nito na ang ama ay isang retiradong pulis.
Nakakulong na ang ginang sa detention cell ng Canlaon City Police at nahaharap sa kasong parricide.
Sa loob ng kulungan ay tulala ang ginang na isang guro at dalawang buwan pa lamang sa bansa nang umuwi ito bilang isang overseas Filipino workers (OFW) na dumaranas ng ‘psychological problems’.
Ayon kay Chief Inspector Wilfredo Alarcon Jr., ng Canlaon City Police, nakatanggap sila ng tawag sa telepono mula sa Canlaon District Hospital hinggil sa kahina-hinalang pagkamatay ng 7-anyos na ayon sa tuminging doktor ay 2-3 oras ng patay nang isugod sa pagamutan ng kaniyang lolo na isang retiradong pulis.
Ayon naman sa tulalang ginang na hindi umano niya matandaan kung napatay niya ang sariling anak subalit, inaming humawak siya ng sinturon at inilagay sa leeg ng anak kung saan iginapos rin niya ang mga kamay nito.
Nang mapatay ang bata ay isinilid niya ito sa sako saka inilagay sa trolley bag at itinapon bago pa man madiskubre ng kaniyang ama sa likuran ng kanilang bahay. Patuloy ang imbestigasyon ng pulisya sa kaso.
- Latest