Obiena balak wasakin ang world indoor record
MANILA, Philippines — Matapos sirain ang Asian record ay puntirya naman ni national pole vaulter Ernest John Obiena na basagin ang World Indoor mark.
“I’m aiming for the World Indoor first, the first major championship on my head, on my calendar,” sabi ni Obiena. “But it would need to be coming from my federation first.”
Inaasahang bibigyan siya ng endorsement ng Philippine Athletics Track and Field Association (PATAFA) para makasali sa nasabing torneo.
Nakatakda ang 2022 World Athletics Indoor Championships sa Marso 18-20 sa Belgrade, Serbia.
Kasalukuyang hawak ni Renaud Lavillenie ng France ang world indoor record na 6.02 meters na kanyang inilista noong 2016 sa Portland, Oregon, USA.
Kamakailan ay ipinoste ng 6-foot-2 na si Obiena ang bagong personal best at Asian mark na 5.93 sa 2021 Golden Roof Challenge sa Austria para burahin ang 5.92m ni Igor Potapovich na itinala ng Kazakh noong 1998.
Noong Agosto ay sumalang si Obiena sa Lausanne leg ng Diamond League kung saan siya tumapos sa fifth place.
Nagsumite rin siya ng bagong personal best at national record na 5.91m sa Paris Leg ng Diamond League bago pumang-apat sa Wanda Diamond League Finals sa Switzerland.
Bukod sa 2022 World Athletics Indoor Championships ay lalahok din si Obiena sa SEA Games sa Hanoi, Vietnam at sa Asian Games sa Hangzhou, China.
- Latest
