Murphy nanghugyaw dayon isip import sa Ginebra
CEBU, Philippines — Si Jordan Murphy mihimo dayon og kasikas isip bag-ong import sa Ginebra.
Ang 29-anyos nga Amerikanong guard miharos og 30 puntos, 13 ka rebounds, pito ka assists, upat ka blocks ug usa ka steal aron ibandera ang Barangay Ginebra Gin Kings ngadto sa 129-111 nga paglampaso sa Rain or Shine Elasto Painters, 129-111, sa PBA Governors Cup niadtong Biyernes sa gabii sa Ninoy Aquino Stadium.
Mangtas kaayo ang Gin Kings nga milabaw nang daan og 21 puntos, 40-19, human sa unang kuwarter nga ila pang gipaburot ngadto sa 33 puntos, 106-75, sa naghinapos nga bahin sa ikatulong kuwarter.
Mikuha sab og atensiyon si RJ Abarrientos uban ang 34 puntos nga iyang gisukipan og siyam ka assists alang sa Ginebra, nga mipakgang sa duha ka sagunson nilang pildi samtang giputol ang upat ka sunod-sunod nga daog sa Rain or Shine.
Ang Gin Kings nagkupot na karon og 3-4 rekord, samtang ang E-Painters natagak sa 4-3.
Sa laing bahin, ang Magnolia Hotshots nakabawi gikan sa mabugnaw nilang sinugdanan aron pakagingon ang Blackwater Bossing, 107-101, alang sa ikaupat nilang sagunson nga daog.
Ang import sa Magnolia nga si KJ Buffen mikulit og impresibong double-double nga 24 puntos ug 20 ka rebounds.
Ang Hotshots ikaduha na karon sa Group B bitbit ang 5-3 nga baraha, samtang ang Blackwater nadakin-as sa 3-4. —Emmanuel B. Villaruel
- Latest
