Cebu Greats gilihian og daog sa MPBL Season 8
CEB, Philippines — Ang Cebu Greats impresibong milusad sa ilang kampanya sa Maharlika Pilipinas Basketball League (MPBL) Season 8 uban ang 81-65 nilang paglampornas sa Rizal Xentro Mall Golden Coolers niadtong Biyernes sa gabii, Abril 10, didto sa Alonte Sports Arena sa Biñan, Laguna.
Human sa sikit nga engkwentro sa first half, ang Greats nagmangtas sa ikatulong kuwarter dayon na ngadto sa 16 puntos nilang demolisyon sa Rizal.
Abante lamang og tres puntos, 35-32, sa halftime, ang Cebu mitagak og 29-11 nga bomba aron pagposte og dakong 64-43 nga bentaha padung sa pinal nga kuwarter. Ang kinadak-an nilang labaw nagbarog hinoon sa 28 puntos, 75-47, sa 3-pointer ni Jun Manzo sa pinal nga 7:26 sa duwa.
Si Manzo, nga mipasud og 11 sa 20 niya ka itsa apil ang lima ka tres, maoy nangu sa Cebu uban ang 29 puntos, tulo ka rebounds, tulo ka assists ug usa ka steal.
Si Paul Desiderio midugang og 11 puntos, duha ka rebounds, lima ka assists ug duha ka steals alang sa Greats, nga makigharong sunod batok sa San Juan Knights karong Abril 16 didto sa Olivarez College Gym sa siyudad sa Parañaque.
- Latest
