Asa ang dagkong Isda?
Gipanghambog ni Presidente Bongbong Marcos Jr. nga magpasko sa prisohan ang mga opisyal sa Department of Public Works and Highways (DPWH) ug usa ka kontraktor ang napaslak sa prisohan sa wala pa ang Disyembre 25, 2025
Apan sa mga napriso, walay bisan usa kanila politiko. Walay Martin Romualdez, walay Zandro Marcos ug Saldy Co. Wala man lang gani sila gipasakaan og kaso kay matud pa walay ebidensiya nga nagtudlo kanila. Bisan sila si Bryce Hernandez ug Henry Alcantara walay kaso nga gipasaka bisan pa man og giuli na nila sa panudlanan sa nasudnong kagamhanan ang minilyon nga salapi nga ilang nakawkaw.
Sa laktod, ang gipasakaan og kaso kadto lamang mga kumong-kumong o bukot-bukot ug dili ang mga alimango ug piranha.
Klaro ug milutaw ang kataphaw ni Presidente Bongbong Marcos sa iyaha kunohay nga paglutos sa mga kurakot kana tungod kay ang mga anaa gayoy kasayoran sa halapad nga korapsyon. Kun giunsa sa pagpangorakot iya kining giayo sa pagtapion aron dili isuka ang ilang baho.
Iyang giilisan ang liderato sa Senado nga nagsugod na sa pag-imbestigar sa flood control project scandal basi sa gitug-an ni Senate President Tito Sotto.
Nagmugna siya og Independent Commission on Infrastructure aron mokalma ang mga tawo sa ilang kalagot ug kaligutgot sa grabing pangorakot sa iyang administrasyon apan gidudahan sa katawhan ang mandato sa ICI.
Sa gipanghimo sa Presidente nawagtangan og pagsalig ang mga tawo ngadto kaniya. Makita kini sa pinakauwahing survey nga gipagawas sa Social Weather Station diin ang Presidente nakakuha og public trust rating nga -3%.
Kun wala ko masayop, si PBBM lang ang nakakuha og negatibo nga trust rating sa mga Presidente sa nasud.
- Latest
