Boatwright mo-debut sa Gilas sa FIBA World Cup Qualifiers

CEBU, Philippines — Si Bennie Boatwright mo-debut alang sa Gilas Pilipinas sa umaabot nga ikalimang window sa FIBA World Cup Asian Qualifiers.

Mosud si Boatwright isip naturalized player sa Pilipinas sa 12-man lineup nga gipagawas sa Samahang Basketbol ng Pilipinas (SBP) kagahapon sa buntag.

Iyang pulihan si Justin Brownlee. Si Gilas head coach Tim Cone nagkanayon nga si Brownlee mopahuway usa aron atimanon ang iyang panglawas.

Nahuman na sa 6-foot-10 nga si Boatwright ang proseso sa iyang naturalization niadtong miaging bulan human maproseso ang iyang pasaporte.

Ubos sa pagpangu sa kanhi import sa San Miguel Beermen, adunay pipila ka players nga mobalik sa Gilas kauban ang mga magdudula nga nagpabilin gikan sa miaging mga window.

Kini mao sila si AJ Edu, Mike Phillips, Quentin Millora-Brown ug Kai Sotto.

Anaa usab sa team sila Kevin Quiambao ug Rhenz Abando, ingon man sila si Juan Gomez-de Liano, Chris Newsome, CJ Perez, Dwight Ramos ug Scottie Thompson.

Ang Gilas makigsangka batok sa Syria ug Iran sa umaabot nga window sa ulahing bahin niining bulana.

Sa pagkakaron, ang Pilipinas nagbarog sa ikalimang dapit sa Group E uban ang 4-4 rekord.

Ang Syria anaa sa ikaunom nga puwesto bitbit ang 2-6 nga baraha, samtang ikatulo ang Iran uban ang 5-3 ngha marka.

Ang tulo lamang ka nag-unang koponan sa matag grupo, lakip ang nasud nga makakuha sa ika-upat nga pinakamaayong rekord sa torneyo, ang makaabante ngadto sa 2027 World Cup didto sa Doha, Qatar.