2nd gold ni Sanchez sa SEAG

Men’s baseball team nagdomina

MANILA, Philippines — Nilangoy ni Olympian Kayla Sanchez ang kanyang ikalawang gold medal habang patuloy ang dominasyon ng men’s baseball team para sa ratsada ng Team Philippines sa 33rd Southeast Asian Games kahapon sa Thailand.

Inangkin ng 24-anyos na Fil-Canadian swimmer ang ginto sa women’s 100m freestyle sa kanyang bilis na 55.36 segundo para idagdag sa naunang panalo sa 4x100m freestyle relay kasama sina Xiandi Chua, Chloe Esleta at Fil-Am Heather White.

May silver din si Sanchez sa women’s 50m backstroke at 200m freestyle.

Sumegunda si White kay Sanchez para sa silver sa women’s 100m freestyle.

Nagdagdag ng silver si Chua sa women’s 200m backstroke.

Binomba ng mga Pinoy batters ang mga Thais, 5-3, para angkinin ang ikaapat na SEA Games gold medal matapos noong 2005, 2011 at 2019 editions.

Naglista si veteran pitcher Romeo Jasmin ng 10 strikeouts sa walong innings para sa kanilang dominasyon.

Kumuha rin ng ginto sina taekwondo jin Tachiana Mangin (women’s -49kg kyorugi), gymnast John Ivan Cruz (men’s vault), Olympian John Cabang Tolentino (men’s 110m hurdles) at Hokett Delos Santos (men’s decathlon).

May 10 golds na ang Pinas kasama ang unang ginto ni Justin Kobe Macario sa men’s individual freestyle poomsae at tig-isa nina gymnast Aleah Finnegan at jiu-jitsu fighters Dean Roxas at Kimberly Anne  Custodio.

Matapos sikwatin ang ginto sa women’s vault ay nakuntento si Finnegan sa tanso sa balance beam sa kanyang 12.467 points.

Nag-ambag ng silver sa kanilang mga events sina taekwondo jins Laila Delo (women’s -73 kg) at Nusair Lao (men’s -68kg), karateka Christian Lachica (men’s -60kg), judoka Joemari-Heart Rafael (women’s judo shiai -57kg), shooter Enrique Enriquez (men’s individual skeet) at Clyde Joy Baria at Ronnel Fuentes (petanque mixed doubles).

Samantala, swak ang Alas Pilipinas women’s team sa semifinals matapos walisin ang Singapore, 25-13, 25-8, 25-18, para sa 1-1 record sa Group A.

Haharapin ng mga Pinay spikers sa semis ang alinman sa Vietnam o Indonesia para sa tiket sa gold medal game.

Sa football, lalabanan ng Filipinas ang Thailand sa semis bukas at sasagupain ng U22 men’s team ang Vietnam sa Lunes para sa tsansang makapasok sa finals.

Sa women’s beach volleyball, tinakasan nina Sisi Rondina at Bernadeth Pons sina Desi Ratnasari at Nur Sari ng Indonesia, 15-21, 21-16, 18-16, sa knockout match.

Sa weightlifting, sisimulan ngayon nina Rosegie Ramos, Fernando Agad Jr. at Jhodie Peralta ang kanilang mga kampanya.