Nuggets milatigo sa Wolves

CEBU, Philippines — Si Nikola Jokic mipabuhagay og 35 puntos sa dihang ang Denver Nuggets nakasugakod sa mainit nga second-half rally sa Minnesota Timberwolves aron pagposte og 115-112 nga kadaogan sa NBA kagahapon didto sa Target Center sa Minneapolis, Minnesota.

Ang two-time MVP gikan sa Serbia mibirada og maayo aron salbaron ang Nuggets nga mikolapso human mi-abante og 18 puntos sa ikaduhang kuwarter.

Ang Wolves, nga mitikang sa korte nga wala ang duha nila ka mga sinaligan nga sila si Karl-Anthony Towns ug Rudy Gobert, duna pa untay tsansa nga makapuwersa og overtime apan nasipyat ang gitira nga tres ni Anthony Edwards dayong kapupos sa oras.

Tungod niini, ang Nuggets miangkon sa ikaduhang puwesto sa Western Conference uban ang 48-21 rekord.

Ang Oklahoma City Thunder naghari gihapon sa West bitbit ang 47-20 nga baraha samtang ikatulo ang Wolves uban ang 47-22 nga marka.

Sa laing bahin, si Kyrie Irving mitali og 28 puntos samtang si Luka Doncic mibulsa sa ika-18 niyang triple-double ning season sa dihang giparotan sa Dallas Mavericks ang San Antonio Spurs, 113-107.

Si Doncic mihipos og 18 puntos, 16 ka assits ug 10 ka rebounds alang sa Mavs nga ikapito karon sa West bitbit ang 40-29 nga baraha.

Didto sa New York, ang New Orleans Pelicans mirehistro sa ikatulo nilang sagunson nga daog human gituhak ang Brooklyn Nets, 104-91.

Ang Orlando Magic mipayaka sa Charlotte Hornets, 112-92, alang sa ikaupat nilang sunod-sunod nga daog, samtang si Fil-Am Jalen Green mipaulbo og 42 puntos sa dihang gilabhan sa Houston Rockets ang Washington Wizards, 137-114. (BANAT NEWS)