Knicks mipayaka sa Warriors; Lakers mipasukarap sa Hawks

CEBU, Philippines — Si Jalen Brunson mipatuasik og 34 puntos sa dihang gipakauwawan sa New York Knicks ang Golden State Warriors, 119-112, sa NBA kagahapon didto sa Chase Center sa San Francisco, California.

Dako sab og naambag si Miles McBride, nga mipabuto og career-high 29 puntos alang sa Knicks sa ikaunom pa lamang nga higayon nga nahimo siyang starter sa iyang karera.

Si Stephen Curry mihipos og 27 puntos apan naminghoy tungod kay ang Warriors nalansang sa ika-10 nga dapit sa Western Conference human nasugamak sa ika-18 nga higayon didto sa ilang korte.

Didto sa Los Angeles, ang Lakers dali nga mibangon human mahagba sa mga kamot sa Warriors ug gipahimungtan sa ilang kapungot ang Atlanta Hawks, 136-105.

Si D'Angelo Russell miposa og unom ka 3-pointers sa iyang 27 puntos samtang sila si LeBron James ug Anthony Davis nagkumboya'g 47 puntos alang sa Lakers nga ikasiyam karon sa West uban ang 37-32 rekord.

Sa laing aksiyon, ang Cleveland Cavaliers impresibong namawi human malubong og 15 puntos aron pakagingon ang Indiana Pacers, 108-103.

Sila si Jarrett Allen ug Caris LeVert mipupo og 23 puntos matag usa alang sa Cavs nga nagpabilin sa ikatulong dapit sa East bitbit ang 43-25 nga baraha. Samtang ang Boston Celtics, nga sud na sa NBA playoffs uban ang 54-14 nga marka, padayong nanginit ug ning higayona gipatikangkang ang Detroit Pistons, 54-14.

Si Jaylen Brown miwadwad og 31 puntos alang sa Celtics sud lamang sa tulo ka kuwarter, samtang si Derrick White mirehistro sa labing unang triple-double sa iyang karera uban ang 22 puntos, 10 ka rebounds, ug 10 ka assists.

Didto sa Salt Lake City, si Anthony Edwards mipabuhagay og 32 puntos apil na ang labing makapakurat nga dunk ning season sa dihang giparotan sa Minnesota Timberwolves ang Utah Jazz, 114-104. Ang Wolves ikaduha gihapon sa West uban ang 47-21 rekord, usa ka duwa lamang ang gintang sa Oklahoma City Thunder(47-20).

Sa Philadelphia, si Tyrese Maxey miharos og 30 puntos, 10 ka assists ug walo ka rebounds sa dihang gipabugnaw sa 76ers ang Miami Heat, 98-91.