FEU Tamaraws basketball tryout sa Cebu karong Biyernes

CEBU, Philippines — Ang mga Sugbuanong basketbolista nga buot mamahimong sakop sa Eastern University Tamaraws basketball team sa UAAP dunay higayon sa pagbuhat niini.

Kini tungod kay si Tamaraws head coach Denok Miranda moanhi dinhi sa Sugbo aron mopahigayon og tryout karong Biyernes, Marso 15, didto sa Capitol Parish Gym sa may dalan Escario, dakbayan sa Sugbo.

Si Miranda, nga nakampiyon uban sa Tamaraws sa iyang panahon sa UAAP ug ex-PBA player, maoy mangu sa usa ka adlaw nga pagpangita og mga talento kauban ang kanhi niya teammate ug karon assistant coach nga si Paul Alelu Flores.

Ang oras gitakda gikan sa alas-9 ngadto sa alas-11 sa buntag alang sa high school ( kadtong natawo sa tuig 2007-2010) ug gikan sa alas-12 sa udto ngadto sa alas-2 sa hapon alang sa college aspirants (kadtong nahimugso sa 2004-2006).

Nanghinaut si Miranda nga makasigpat og mga potensiyal nga interesadong mamahimo nga miyembro sa Tamaraws.

Kabahin sab kini sa hugtanong pagpangandam sa FEU alang sa sunod nga UAAP season.