Celtics padayong nanginit
CEBU, Philippines — Ang Boston Celtics nagsandig sa 32 puntos ni Jayson Tatum ug sa 21 nila ka 3-pointers aron ilampaso ang Dallas Mavericks, 138-110, sa NBA kagahapong adlawa didto sa TD Garden sa Boston, Massachusetts.
Bugnaw kaayo ang sinugdanan ni Tatum nga nasipyat sa nag-una niyang upat ka itsa, apan ang All-Star forward mipabuto og 16 puntos sa ikatulong kuwarter aron tabangan ang Celtics pagkontrola sa duwa sa hingpit.
Igo lamang nakasikit ang Mavs ngadto sa dos puntos gumikan kay sila si Jaylen Brown ug Tatum milansang og duha ka sagunson nga tres aron pag-inat og balik sa labaw sa Celtics dayon na ngadto sa paglubong sa ilang mga bisita.
Si Brown mitapos uban ang 25 puntos, samtang si Kristaps Porzingis midugang og 24 puntos alang sa Celtics nga miposte sa ika-10 nilang sagunson nga daog.
Naghagba ang Mavs bisan og ang alas nilang si Luca Doncic mikadlit sa ika-12 niyang tripe-double ning season.
Si Doncic mipaulbo og 37 puntos nga iyang gipalamanan og 12 ka rebounds ug 11 ka assists alang sa pilderong kawsa,
Si Kyrie Irving nakamaneho og 19 puntos bisan og nakapasud lamang og siyam sa 23 niya ka itsa.
"In simple terms, we have a really good team," matud pa ni Tatum human ang Celtics nahimong labing unang team nga nakasagunson og 10 ka daog ning season.
"Every night is going to look a little bit different. As long as we continue to build good habits and win, it's all going to work itself out," dugang pa ni Tatum.
- Latest
