Cebu Grand Prix, Donling sud na sa semis
CEBU, Philippines — Mipatigbabaw ang Cebu Grand Prix ug JMD Automotive batok sa ilang mga kaatbang sa quarterfinals sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.
Ang Cebu Grand Prix milubong sa New Era, 65-44 ug gilubong usab sa JMD ang JLT Sorbeteros sa iskor nga 64-51aron maseguro ang luna sa semifinals ning maong liga nga giorganisar sa Brothers Ball League ubos sa liderato ni Marvin Sillar.
Hinugtanay sa. bakus ang nasaksihan sa maong duwa ug diha na naputol ang hugot nga kumbati human magtabla ang iskor, 45-all sa nahabiling 6:34 sa fourth quarter kay nihupas na ang maayong labok sa JLT Sorbeteros dihang ang JMD Automotive nihudlat pinaagi sa ilang makalilisang nga rally kortesiya nilang Alain Tarona, Kevin Pepito ug Dexter Maru nga maoy naghawan sa dalan paingon sa kadaogan.
Si Tarona, kinsa maoy best player ang nangulo sa JMD sa iyang 14 points, 10 rebounds, 6 blocks ug 4 assists. Katorse puntos sab ang nahimo ni Pepito, samtang si Maru nitampo'g 11 puntos sa team ni Gerald Dilao.
Mikandos unta og 20 puntos si Charly Oca ada alang sa JLT, apan kulang kini'g suporta sa iyang kaubanan maong nahagba ang koponan ni Jack Leonard Tagacanao.
Sa laing bahin, tulo ka magduduwa sa Cebu Grand Prix ang mikulit og double figures sa pagpangulo ni Roel Villaganas, kinsa mao sab ang best player of the game sa iyang 17 puntos, walo ka rebounds ug lima ka assists. Maayo sab nakaduwa si Roldan Daug nga mihipos og 16 puntos ug si Lucky Mendoza nga miposa'g 12 puntos sa koponan ni Errol Mendoza. Si Johnray Formentera lang ang nakaabot og 10 puntos sa natagak nga New Era ni Christian Ivan Batitay.
Karong Domingo, ang nagmadaugong mga koponan moatubang na sab sa ilang laing misyon alang sa knockout semis batok sa nagpaabot nga Goutsource Solution International (GSI) ug Donling Aircon and Refrigeration Services. Unang magsangka ang Cebu Grand Prix batok sa topseed GSI sa alas-6 sa gabii, sundan dayon sa mortal nga karibal JMD ug second seeded Donling.
- Latest
