Cebu Grand Prix pabiling nag-una sa Donling Cup

CEBU, Philippines — Human nawala sa eksina sud sa duha ka Domingo, ang aksyon sa Donling Cup 2024 nibalik na sab diin ang topseed Cebu Grand Prix ug second seeded Goutsource Solution International (GSI) nidaog sa ilang managlahing mga kontra.

Ang Cebu Grand Prix nidaog sa CJL sa iskor, 64-50 ug midaog sab ang GSI pinaagi sa paglubong sa Bucket Blazers, 84-51 niadtong Domingo diha sa Ateneo de Cebu old campus covered court sa Mango Avenue, Cebu City.

Silang Angelo Ponce ug Rhojay Neme o nagkumbinar og 28 puntos aron alsahon ang Cebu Grand Prix sa kadaogan.  Si Ponce mipupo'g 17 puntos uban ang unom ka rebounds ug upat ka assists aron ilhon isip best player of the game, si Neme o dunay 11 puntos alang sa Cebu Grand Prix ni Errol Mendoza nga kasamtangang nag-una sa standing sa ilang 6-1 win-loss record.

Ang CJL Sniper nga nagbitbit og 3-3 nga baraha gipangulohan ni Jade Nepumoceno nga mipabuto og 14 puntos. Ang team manager nga si James Lapinig ug Jimmy Fernan parehong mikadlit og 10 puntos.

Ligas pa kaayo ang duwa sa nag-unang duha ka kuwarter, apan pagtungtong sa third period ang Cebu Grand Prix mipasiugda'g rally ubos sa pagpangulo nilang Ponce, Neme o ug Roel Villaganas hinungdan nga wala na makasikit ang CJL.

Sa laing bahin, unom ka GSI players ang mirehistro'g double figures ubos sa liderato ni Geory Apas nga miiskor og 15 puntos,. Mihimo sab siya'g 10 ka rebounds ug upat ka assists aron tahuron isip best player of the game. Si Michael Daan miiskor sab og 15 puntos aron tabangan ang GSI ni Ivan Llesol  mopabilin sa ikaduhang dapit uban ang 5-1 record. Si Marvin Sillar mitampo'g 13 puntos, si Soc Ramas miambit og 11 puntos, samtang sila si VM Cempron ug Dan Cardenas nag-amotay og 10 puntos matag usa.

Ang Bucket Blazers ni Chyrus Blen gipangulohan ni Bernie Brylle Da o nga mipugnit og 15 puntos, samtang si Gilbert Delos Reyes miamot og 13 puntos. Ang Bucket Blazers wala pa gyud katilaw og daog sa unom ka duwa ning maong liga nga giorganisar sa Brothers Ball League ubos sa liderato ni Marvin Sillar.